Bu il ərzində yenidən salınmış Cəbrayıl şəhərinin mərkəzinə, eləcə də bu rayonun bir neçə kəndinə köç planlaşdırılır.

TNS-in yerli müxbirinin xəbərinə görə, bunu Cəbrayıl, Qubadlı və Zəngilan rayonlarında Azərbaycan Respublikası Prezidentinin xüsusi nümayəndəsi Vahid Hacıyev Şuşada keçirilən “Sahibkarlar üçün yeni imkanlar: Qarabağı birlikdə quraq" adlı tədbirdə deyib.

Onun sözlərinə görə, il ərzində Cəbrayıl şəhərində 712 mənzildən ibarət 33 binanın təhvil verilməsi nəzərdə tutulub: "Zəngilan və Qubadlı rayonlarında da yeni yaşayış məskənlərinin inşası davam edir, həmin ərazilərə də köç nəzərdə tutulur. Hər bir yaşayış məskəninə sakinlər köçdükcə orada yeni sahibkarlıq imkanları yaranır. Buna misal olaraq yaxın gələcəkdə Cəbrayıl şəhərində yaşayış binalarının qeyri-yaşayış hissələrində müxtəlif istiqamətli biznes fəəliyyətlərin həyata keçirilməsi məqsədilə həm köç edəcək sakinlər, həm də sahibkarlar üçün şərait yaradılmış, onların fəaliyyət göstərməsi istiqamətində işlər aparılmaqdadır".

Onun sözlərinə görə, bütün işğaldan azad olunmuş ərazilərdə olduğu kimi, Cəbrayıl, Qubadlı və Zəngilan rayonlarında da Prezident İlham Əliyevin rəhbərliyi altında bir sıra yaşayış məntəqələrinin təməli qoyulub, tikinti-quruculuq işləri uğurla davam etdirilir: "Hər biriniz işğaldan azad edilmiş ərazilərə gəlişinizdə sürətlə gedən bərpa-quruculuq işlərinin şahidi olursunuz. “Böyük Qayıdış”ın ilk ünvanı sayılan Zəngilan rayonunun Ağalı kəndində artıq həyat var. Ağalı “Ağıllı kənd” prinsipləri əsasında qısa müddət ərzində inşa edilib, əhalinin yaşayışı üçün zəruri olan bütün infrastruktur orada yaradılıb. Bugünədək "Böyük Qayıdış”a dair I Dövlət Proqramı çərçivəsində Ağalıda 175 ailədən ibarət 871 nəfər sakin məskunlaşıb və firəvan şəkildə yaşayır.

Qeyd edim ki, Cəbrayıl rayonunun Horoğlu qəsəbəsinə köç nəzərdə tutulur. Hazırda Cəbrayılın Şükürbəyli kəndində, Qubadlı rayonunun Zilanlı və Mahruzlu kəndində, Zəngilanın şəhər mərkəzində böyük tikinti aparılır".

Ziya Əmirxanlı