Türkiyə zəngin tarixi və mədəni irsi ilə dünyanın ən dəyərli muzeylərinə ev sahibliyi etməkdədir. Anadolu torpaqlarında müxtəlif sivilizasiyalara məxsus əsərlərin nümayiş olunduğu muzeylər hər il milyonlarla ziyarətçi qəbul edir, həm mədəni turizmin inkişafına töhfə verir, həm də tarixi izləri müasir dövrə daşıyır.

Türkiyənin ən zəngin eksponatlara sahib muzeyləri bunlardır:

Topqapı Sarayı muzeyi (İstanbul): Osmanlı İmperiyasının idarəetmə mərkəzi olan Topqapı Sarayı padşah xəzinələri, müqəddəs əmanətlər və sənət əsərləri ilə ziyarətçilərə möhtəşəm bir tarix təqdim edir.

Anadolu Mədəniyyətləri muzeyi (Ankara): Anadolu ərazisindəki müxtəlif sivilizasiyalara aid əsərlərin saxlandığı bu muzey, xüsusilə arxeologiya həvəskarlarının diqqətini cəlb edir.

Göbəkli Təpə (Şanlıurfa): İnsanlıq tarixinin məlum olan ən qədim ibadətgahı sayılan Göbəkli Təpə UNESCO-nun Ümumdünya İrs Siyahısında yer alır.

Zeuqma Mozaika muzeyi (Qaziantep): Roma dövrünə aid mozaikaları ilə məşhur olan bu muzey, xüsusilə “Çingənə Qızı” mozaikası ilə diqqət çəkir.

Sağlamlıq və mədəni turizmin yüksələn ulduzu

Bursa mədəni zənginlikləri ilə yanaşı, sağlamlıq turizmi ilə də fərqlənir. Osmanlı İmperiyasının ilk paytaxtı olan şəhərdəki Bursa Şəhər Muzeyi və Osmanlı türbələri tarixi atmosferi yaşadarkən, şəhərin termal mənbələri sağlamlıq axtaranların sevimli məkanına çevrilir.

Rəqəmsallaşma ilə muzeylərə asan əlçatanlıq

Türkiyədəki muzeylər rəqəmsallaşma təşəbbüsləri çərçivəsində virtual turlar və onlayn sərgilər təqdim edərək, hər yerdən ziyarət imkanı yaradır. İstanbul Arxeologiya Muzeyi və Pera Muzeyi kimi qurumlar da virtual turlarla beynəlxalq səviyyədə böyük maraq qazanır.

Muzey ziyarətlərində rekord artım

Türkiyə Mədəniyyət və Turizm Nazirliyinin açıqlamasına görə, 2023-cü ildə ölkədəki muzeylərin ziyarətçi sayısında rekord artım qeydə alınıb. Xüsusilə İstanbul muzeyləri, xarici turistlərin böyük marağı ilə yenidən canlanıb. Muzey Kart tətbiqi isə yerli ziyarətçilərə bir çox muzeyi daha sərfəli qiymətlərlə ziyarət etmək imkanı yaradır.