Türkiyənin kulinariya mədəniyyəti bütün dünyada məşhurdur. Bu qastronomiya mozaikasında cənub-şərqdə yerləşən Mardin vilayəti çoxmədəniyyətli irsini əks etdirən bənzərsiz kulinariya təcrübələri ilə seçilir.

İpək Yolunun ən gözəl məkanlarından biri olan, çoxsaylı xalqların, inancların beşiyi sayılan bu şəhər bölgənin məhsullarından maksimum şəkildə istifadə edərək zəngin mətbəx mədəniyyətini nümayiş etdirir. Əkinçiliyin beşiyində yerləşən Mardin zəngin mətbəxi ilə ziyarətçilərini heyran edir.

Sivilizasiyalar mətbəxi

Mardində səhər yeməyindən şam yeməyinə qədər hər bir yemək bir ziyafətə çevrilir və bütün zövqlərə uyğun müxtəlif təamlar təqdim olunur. Şəhərin multikultural keçmişi yalnız memarlığı və sosial ənənələrində deyil, həm də kulinariya irsində hiss edilir.

Türkiyənin digər cənub-şərq şəhərləri kimi, Mardinin mətbəxi də əsasən, ət yeməklərindən ibarətdir. Bir çox yemək meyvə və ətin birləşməsindən hazırlanaraq unikal dad harmoniyası yaradır. Bununla yanaşı, şəhərin mətbəxində yabanı xiyar, ardıc, mərcangilə və kenger kimi yerli bitkilər də mühüm rol oynayır.

Mardinin mətbəxi eyni zamanda, tarixi İpək Yolunun mirası olan zəngin ədviyyat istifadəsi ilə tanınır. Darçın, keşniş, hil, zəncəfil və ətirşah kimi ədviyyatlar təkcə duzlu yeməklərdə deyil, həm də desertlərdə geniş istifadə olunur.

Səhər yeməyi

Türkiyədə səhər yeməyi ilə günə başlamaq ən gözəl seçimlərdən biridir. Səhər yeməklərində bölgələr arasında böyük fərqlər mövcuddur və hər yerdə fərqli təamlar təqdim olunur. Mardinin ənənəvi səhər süfrəsi də bu müxtəliflikdən geri qalmır və bölgədən toplanan yerli məhsullarla zənginləşir.

Mardin səhər yeməyinin şahı, demək olar ki, hər mövsümdə mövcud olan bölgəyə məxsus pendirlərdir. Bunlara Mardin lavaş pendiri, dil pendiri, duzsuz şirin pendir və keçi pendiri daxildir. Səhər süfrəsində, həmçinin ədviyyat qarışığı, təbii kərə yağı, tahin (küncüt yağı)-üzüm doşabı, Mardinin məşhur derik zeytunları və digər dadlı təamlar yer alır.

Coğrafi simvollar və unikal dadlar

Səhər yeməyindən sonra Mardinin daş evlərini, kilsələrini, monastırlarını və məscidlərini ziyarət etmək mümkündür. Tarixi yerləri gəzərkən digər yerli ləzzətlərlə də tanış ola bilərsiniz. Bunlara ətli xəmir yeməyi olan sembusek və qiymə ilə doldurulmuş bulqur yeməyi – qaynadılaraq hazırlanan ikbebet və qızardılaraq təqdim olunan irok daxildir. Sonra şəhərin tarixi bazarlarını gəzmək olar.

Axşam yeməyi üçün Mardinin kabablarını və ləzzətli güveç yeməklərini sınaqdan keçirə bilərsiniz. Şəhərin ən məşhur ənənəvi yeməkləri arasında soğan kababı, içalatla doldurulmuş kibbe (işkəmbə dolması), turşməzə dadlı alluciye (gavalı güveci) və yaşıl badamla bişirilən firkiye (quzu güveci) yer alır. Xüsusilə qabırğa dolmasını suriyani şərabı ilə dadmaq tövsiyə edilir.

Əsrlərdən bəri bişirilən qabırğa yeməyi təxminən üç saat ərzində hazır olur.

Yeməyi üzüm bəhməzindən hazırlanan və pudinqə bənzəyən harire adlı desertlə tamamlaya bilərsiniz. Şəhəri tərk etməzdən əvvəl mütləq Mardinin məşhur mırrasını da dadın. Bu güclü qəhvə kiçik fincanlarda verilir və türk qəhvəsinə bənzəyir, amma çox daha konsentrat və kəskin dada malikdir.

Ləzzətli suvenirlər

Mardin qastronomiya həvəskarlarına unudulmaz təamlar təqdim etməklə yanaşı, zəngin kulinariya irsindən bir parça aparmaq imkanı da verir. Məşhur lahor ağacından əldə edilən bitki boyası ilə mavi rəngə boyanmış badam konfetləri və Mardin bulquru unikal hədiyyələr arasında önəmli yer tutur. Bundan əlavə, üzüm bəhməzindən hazırlanan cevizli sucuk (qozlu sucuq), qovrulmuş noxud və derik zeytun yağı da mükəmməl hədiyyə seçimləri ola bilər.

Mardin həmçinin geniş çeşiddə suriyani şərabları istehsal edir. Bu şərabları bölgənin bazarlarında və şərabxanalarında dadaraq zövqünüzə uyğun olanları seçə bilərsiniz.

Mardinə Necə Getmək Olar?

Mardinə Türkiyənin müxtəlif şəhərlərindən birbaşa uçuşlarla rahatlıqla çata bilərsiniz. İstanbuldan Mardinə uçuş cəmi iki saat çəkir. Hava limanından şəhər mərkəzinə gedən yolda kirayə avtomobillər, avtobuslar və taksilər xidmətinizdədir.

Mardində harada qalmaq olar?

Mardin hər büdcəyə uyğun geniş yerləşmə seçimləri təklif edir. Zəncir otellərdən pansionlara qədər müxtəlif variantlar arasından seçim edə bilərsiniz. Köhnə Şəhərdə yerləşən və otelə çevrilmiş bərpa olunmuş Mardin evlərində qalmaq, şəhərin ruhunu hiss etmək üçün ən gözəl seçimlərdən biridir.

Mardində görməli yerlər

Mardin Qalası

Zinciriye və Kasımiye Mədrəsələri

Ulu Məscid

Mor Qabriel Monastırı

Mardin Muzeyi

Dara antik şəhəri

Mardinin dar küçələri və daş evləri.