“Rollme” “Galaxy Ring” (400 dollar) və “Oura Ring” (300 dollar) kimi rəqiblərin oxşar məhsullarının qiymətindən əhəmiyyətli dərəcədə aşağı olan yeni ağıllı R3 üzük buraxıb.

TNS xəbər verir ki, bu barədə GSMArena məlumat yayıb.

Qiyməti cəmi 90 dollar olan “Rollme R3” üzük 7-dən 12-ə qədər ölçülərdə mövcuddur və üç rəng variantında təqdim olunur: qara, gümüş və qızılı. Üzük gövdəsi titandan, daxili hissəsi isə dərinin qıcıqlanmasından qoruyan hipoalerjenik epoksi qatranından hazırlanıb.

Daxili 17,5 mAh batareya sayəsində üzük 10 günə qədər doldurulmadan işləyə bilər və doldurma qutusu batareyanın ümumi ömrünü 60 günə qədər artırır.

Cihaz infraqırmızı sensorlar, qırmızı və yaşıl işıq diodları ilə təchiz olunub ki, bu da ürək göstəricilərini, o cümlədən ürək döyüntüsünü, ritm dəyişkənliyini və qanın oksigenlə doyma səviyyələrini izləməyə imkan verir. Bu xüsusiyyətlər istifadəçilərə qaçış, velosiped sürmə və gəzinti kimi idman fəaliyyətləri zamanı sağlam həyat tərzini və fiziki fəaliyyətini idarə etməyə kömək edəcək.

Bundan əlavə, “Rollme R3” jestlərə nəzarət funksiyasını dəstəkləyir. Məsələn, ikiqat toxunma musiqi dinləmək, şəkil çəkmək, video yazmaq və ya elektron kitabın səhifələrini çevirmək üçün konfiqurasiya edilə bilər.