Aprelin 1-də Azərbaycan Milli İstiqlal Partiyasının qurucusu və ilk sədri, sabiq deputat Etibar Məmmədovun 70 illik yubileyi münasibəti ilə çap olunan "İstiqlal yolu" kitabının təqdimat mərasimi keçirilib.

TNS xəbər verir ki, millət vəkillərinin, siyasi partiya sədrlərinin, ictimaiyyət və media nümayəndələrinin iştirakı ilə keçirilən tədbirdə kitabın müəllifi, tarix elmləri doktoru, professor Məhərrəm Zülfüqarlı giriş sözü ilə çıxış edib. Kitab haqqında məlumat verən müəllif qeyd edib ki, iki cilddən ibarət olan nəşrin I cildi Etibar Məmmədovun həyat yolunun, milli istiqlal mücadiləsinin ötən əsrin 90-cı ilinin əvvəlinə qədərki dövrünə, siyasi fəaliyyətinə, II cildi isə ötən əsrin 1990-1995-ci illərdəki ictimai-siyasi və elmi fəaliyyətinə həsr olunub.

O, kitabın 3-cü cildinin də yaxın vaxtlarda çap olunacağını açıqlayıb.

Yubliyar Etibar Məmmədov çıxışında kitabın müəllifinə təşəkkür edib, Məhərrəm Zülfüqarlı ilə tələbə yoldaşı olduğunu xatırladıb: “Onunla Milli Azadlıq Hərəkatında da mübarizə yoldaşı olmuşuq. Həmin dövrün tarixi, siyasi bioqrafiyasını yazan Məhərrəm Zülfüqarlı çox böyük iş görüb.

Mənim üçün bu 70 ildə ən xoşbəxt gün Azərbaycanın müstəqillik əldə etməsi, ikinci xoşbəxt günüm isə Azərbaycanın ərazi bütövlüyünün, suverenliyinin bərpa edildiyi gündür”.

Vətəndaş Həmrəyliyi Partiyasının sədri, Xalq şairi Sabir Rüstəmxanlı çıxışında deyib ki, Etibar Məmmədov Azərbaycan Milli Azadlıq Hərəkatının öncüllərindən biridir: "Təəssüf ki, həmin dövrdə olan dostlarımızın əksəriyyəti dünyasını dəyişib. Nə yaxşı ki, Etibar Məmmədov 70 yaşında hələ də gümrahdır.

Etibar Məmmədov Milli İstiqlal Partiyasının bir növ tarixini yazıb. Milli İstiqlal Partiyası təşkilatlanmış bir partiya idi və bütün təşkilatçılığı ilə nümunəvi bir siyasi qüvvə olub. Etibar Məmmədovla şəxsi dostluğumuz bu günə qədər davam edir. Onun Azərbaycanın müstəqillik qazanmasındakı xidmətləri danılmazdır".

Deputat Fazil Mustafa Etibar Məmmədovun Azərbaycan Xalq Hərəkatının tanınmış simalarından biri olduğunu diqqətə çatdırıb: "O, həmişə öz fərqliliyi ilə seçilən şəxsiyyətlərdən biri olub. O, Azərbaycanın ərazi bütövlüyünün qorunması prosesində də aktiv iştirak edən siyasətçilərdəndir. Bu gün onun 70 illik yubileyi, kitab təqdimatı və gördüyü işlər eyni zamanda onun siyasi fəaliyyətinin bir növ hesabatıdır".

Ana Vətən Partiyasının sədri Fəzail Ağamalı, AĞ Partiya sədri Tural Abbaslı çıxış edərək yubilyara təbriklərini çatdırıblar.

Qeyd edək ki, Etibar Məmmədov 1955-ci il aprel ayının 2-də Bakı şəhərində anadan olub.

Ötən əsrin 80-ci illərinin sonlarından başlayan Milli Azadlıq Hərəkatının liderlərindən biri olaraq hərəkata rəhbərlik edib. 1990-cı il 20 yanvar qətliamını beynəlxalq aləmə çatdırmaq üçün imperiyanın paytaxtı Moskva şəhərinə gedərək burada Azərbaycanın daimi nümayəndəliyində mətbuat konfransı keçirib. Bundan dərhal sonra keçmiş SSRİ DTK-sı tərəfindən həbs olunub və 9 ay məşhur Lefortovo həbsxanasında yatıb. Həmin vaxt Azərbaycanda Etibar Məmmədovun həbsdən azad olunması üçün rekord miqdarda - 1,5 milyon imza yığılmışdı. Həbsdən azad olunduqdan sonra Milli Məclisin deputatı seçilib. Azərbaycanın Müstəqillik Aktının müəlliflərindən biridir. Azərbaycan Respublikasının müstəqilliyinin digər ölkələr tərəfindən tanınması üçün formalaşan Parlament Nümayəndə Heyətinin rəhbəri kimi Türkiyə Cümhuriyyətində və Pakistanda olub. Etibar Məmmədov 1992-ci ildə Azərbaycan Milli İstiqlal Partiyasının 1-ci qurultayında partiyanın ilk sədri seçilib.