Daha çox "Rossotrudniçestvo" kimi tanınan Müstəqil Dövlətlər Birliyi, Xaricdə Yaşayan Həmvətənlər və Beynəlxalq Humanitar Əməkdaşlıq üzrə Federal Agentliyin rəhbəri Yevgeni Primakov özünün "Telegram" kanalında işgüzar nüfuzunu qorumaq üçün məhkəməyə hazırlaşdığını açıqlayıb.

TNS xəbər verir ki, bu barədə "Caliber"in analitik "YouTube" kanalının yeni buraxılışında söhbət açılıb.

"Mən Azərbaycan hökuməti tərəfindən maliyyələşdirilən kütləvi informasiya vasitələrindən bu böhtan və yalanın təkzibolunmaz sübutlarını eşitmək istərdim. Ya təkzib və üzrxahlıq", - Yevgeni Primakov yazıb.

Məqalədə qeyd olunub ki, "Azərbaycan hökuməti tərəfindən maliyyələşdirilən kütləvi informasiya vasitəsi" nə edib ki, bu, "Rossotrudniçestvo"nun rəhbərini təkzibedilməz sübutlar və ya təkzib və üzr gözləməyə vadar edib?

"Bu günlərdə Baku TV kanalı süjet hazırlayıb ki, orada Rusiya xüsusi xidmət orqanlarının "Rossotrudniçestvo"nun Azərbaycandakı nümayəndəliyi olan Bakıdakı "Rus Evi"nin himayəsi altında fəaliyyət göstərməsi barədə deyilirdi. Yəqin ki, jurnalistika araşdırması zamanı əldə edilən məlumatlar Baku TV-nin müxbirlərinə bu qənaətə gəlməyə əsas verib. Lakin indidən qeyd edək ki, biz Baku TV-nin daxili işinə qarışmaq fikrində deyilik və həmkarlarımızın apardığı jurnalist araşdırmasının bütün incəliklərini bilmirik. Buna baxmayaraq, "Rossotrudniçestvo" ilə bağlı müəyyən faktlar və hadisələr, o cümlədən mediada qeyd olunan casus qalmaqalları bəzi ölkələrin öz ərazilərində bu strukturun fəaliyyətini məhdudlaşdırmaq istəyini anlamaq üçün ilkin şərtlər yaradır. Burada hətta sual yox, heyrətlə qarşılaşırıq. Əvvəla, heç vaxt Baku TV-nin Azərbaycan hökuməti tərəfindən maliyyələşdirildiyinə dair heç bir eyham olmayıb. Amma gəlin bir anlıq təsəvvür edək ki, bu həqiqətən də belədir. Qəribə deyilmi ki, biz azərbaycanlı jurnalistlər bunu bilmirik, amma Rusiya humanitar təşkilatının rəhbəri bu barədə kifayət qədər məlumatlıdır? Bəlkə də Baku TV rəhbərliyinin böhtan, şərəf, ləyaqət və işgüzar nüfuzunun qorunması ilə bağlı əks iddia ilə məhkəməyə müraciət etməsi məntiqə uyğundur?", - məqalədə qeyd olunur.

Daha ətraflı videoda: