Yaz aylarında, tozcuqların havaya yayıldığı bir vaxtda allergiyası olan bəzi insanlarda burun axması, qaşınma, asqırma, gözlərdə sulanma, qızartı kimi şikayətlər olur ki, buna bahar allergiyası deyilir.

TNS xəbər verir ki, pulmonoloq, professor Sami Öztürk bunu əsas səbəbinin polen olduğunu deyir.

Onun sözlərinə görə, allergik insan çiçək tozcuqlarına nə qədər çox məruz qalırsa, əlamətlər o qədər çox olur.

Allergiyası olan insanlarda burun tıxanması, tez-tez asqırma, burun, damaq və qulaqlarda qaşınma, nadir hallarda isə burun qanaması, gözlərdə qızartı, sulanma, qaşınma, astması olan insanlarda isə xroniki öskürək, təngnəfəslik və xırıltı kimi simptomlar ortaya çıxır. Bu şikayətlər gündəlik həyati fəaliyyətlərə təsir edən yorğunluğa, burun tıxanıqlığı və təngənəfəslik isə yuxu rejiminin pozulmasına səbəb olur.

Həkim bahar allergiyası üçün əsas risk faktorlarının yüksək hava çirkliliyi və böyük şəhərlərdə yaşamaq, evdə ev heyvanı saxlamaq, evdə siqaret çəkmək, bir yaşından əvvəl ana südü ilə qidalanmamaq və polenlərin çox olduğu bölgələrdə yaşamaq olduğunu bildirib.

Öztürk diaqnozda həkim müayinəsi və testlərin vacib olduğunu, ancaq davamlı müalicə olunmazsa xroniki astmaya çevrilə biləcəyini vurğulayıb: "Yaz allergiyasından qurtulmağın qəti bir yolu olmasa da, bəzi qorunma üsulları ilə xəstələr özlərini çox daha rahat hiss edə və az dərman istifadə edə bilərlər. Bunu üçün tozcuqların səviyyəsinin ən yüksək həddə olduğu səhərdən günortaya qədər olan vaxt aralığında açıq havaya çıxmaq və ya pəncərələri açmaq məsləhət görülmür. Belə xəstələr üçün əlverişli vaxt axşam saatları və yağışdan sonradır".