Ucuz ağrıkəsici aspirin xərçəngin yayılmasının qarşısını ala bilər.

TNS BBC News-a istinadən xəbər verir ki, Kembric Universitetinin alimləri heyvanlar üzərində aparılan təcrübələrdə aspirinin immun sisteminin xərçənglə mübarizə qabiliyyətini artırdığını müəyyən ediblər.

Rutin aspirin istifadəsi risklərlə müşayiət olunur və tədqiqat hələ də hansı xəstələrin daha çox fayda əldə edəcəyini anlamağa çalışır. Ancaq hər gün aspirin qəbul edən insanlara xərçəng diaqnozu qoyulsa belə, onların sağ qalma ehtimalı daha yüksəkdir.

Bu, xərçəng hüceyrələrinin həssas anı ilə əlaqəlidir- tək bir hüceyrənin əsas şişdən qoparaq küləyin apardığı toxumlar kimi bütün bədənə yayılmağa çalışdığı an. Bu proses metastaz adlanır və xərçənglə əlaqəli ölümlərin əksəriyyətinin səbəbidir.

İmmunitet müdafiəmizin bir hissəsi - T hüceyrələri adlanan ağ qan hüceyrələri - kök salmağa çalışan xərçəngə hücum edə və məhv edə bilər. Ancaq araşdırmalar göstərir ki, qanımızın başqa bir hissəsi - normal olaraq qanaxmanı dayandıran trombositlər T hüceyrələrini boğur və onların xərçənglə mübarizəsini çətinləşdirir.

Aspirin isə trombositlərin funksiyasını pozur və onların T hüceyrələrinə təsirinin qarşısını alır ki, onlar xərçənglə mübarizə apara bilsinlər.

Aspirin insult da daxil olmaqla təhlükəli daxili qanaxmaya səbəb ola bilər, buna görə də risklər balanslaşdırılmalıdır. Bu təsirin bütün xərçənglərə, yoxsa yalnız bəzilərinə aid olduğu da aydın deyil və bunlar hələki heyvanlar üzərində aparılan tədqiqatlardır.  Elm adamları bunun insanlara aid olduğunu düşünsələr də, hələ də təsdiqlənməlidir.

Xərçəng riskini artıran Linç sindromlu bəzi xəstələrə artıq aspirin qəbul etmək tövsiyə olunur. Ancaq daha çox xəstəyə fayda verəcəyini görmək üçün hələ də müvafiq klinik sınaqlara ehtiyac olacaq.