Əlimizin altında hər zaman hazır qoyduğumuz “Nimesil” dərmanı ilə bağlı xoşagəlməz məlumatlar yayılır. Dünyanın bir sıra ölkələrində bu dərmanın qadağan oldunduğu, fəsadları vurğulanır.

Qeyd edək ki, “Nimesil” (nimesulid) qeyri-steroid iltihab əleyhinə dərman vasitəsi (NSAID) kimi geniş şəkildə istifadə edilir. Ağrıları, iltihabı və yüksək temperaturu azaldan təsirə malik olan bu dərman ölkəmizdə də çox geniş istifadə olunur.

“Nimesil” əsasən, ağrıların müalicəsi, osteoartrit və digər iltihablı xəstəliklər nəticəsində yaranan ağrıları və şişkinliklərin azaldılmasında, əməliyyatdan sonra yaranan ağrılar və iltihabın müalicəsində, yaralanmalar, zədələr nəticəsində yaranan ağrıların müalicəsində istifadə olunur.

Dərman istifadəsi zamanı yarana biləcək yan təsirlərə diqqət edək: ürəkbulanma, qusma, mədə ağrısı, diareya, mədə qıcqırması. Uzun müddət istifadə olunarsa, mədə-bağırsaqda qanaxma və ya xoralar inkişaf edə bilər. Bundan başqa, qaşınma, səpmə və ya dəri həssaslığının yaranması mümkündür. Həmçinin, qaraciyər funksiyalarına zərər verə bilər. Bu səbəbdən qaraciyər problemləri olan şəxslər dərmanı ehtiyatla qəbul etməlidirlər.

Nadir hallarda, anafilaktik şok kimi ciddi allergik reaksiyaların baş verməsi mümkündür. Bəzi hallarda dərman baş ağrısı və başgicəllənməyə səbəb ola bilər.

Dərmanın yan təsirləri içlikdə qeyd olunub.

Təhlükəsi haqqında məlumatlar yayılan “Nimesil” ölkəyə hansı şərtlər çərçivəsində gətirilir? Ümumiyyətlə, dərmanın gətirilməsi dayandırıla bilərmi?   

TNS məsələ ilə bağlı Analitik Ekspertiza Mərkəzinə sorğu ünvanlayıb.

Qurumdan bildirilib ki, nimesulid tərkibli dərman vasitələri müvafiq tövsiyələrə əməl edilərək, faydasının potensial risklərindən üstün olduğu qərarı verildikdən sonra və bir sıra farmakonəzarət tədbirlərinin icrası şərti ilə qeydiyyata alınıb.

Qeyd olunub ki, mövcud hepatotoksiklik riskini idarə edə bilmək üçün nimesulid tərkibli dərman vasitələrinin içlik vərəqəsinin müvafiq bölmələri vasitəsilə  tanış olmaq mümkündür. İçlik vərəqəsinə əlavə edilən bu məlumatlar onun qaraciyər toksikliyi riski və digər əlavə təsirlərinin nəzarətə alınmasına və minimallaşdırılmasına imkan verir.

Qurumdan o da bildirilib ki, nimesulid tərkibli dərman vasitələrinin qadağan edilməsi və ya məhdudlaşdırılması ilə bağlı qərarlar milli tənzimləmə yanaşmalarından asılıdır: “Bəzi ölkələrdə riskləri olan preparatların preventiv şəkildə bazardan çıxarılmasına üstünlük verilir (ABŞ, Avstraliya və s.). Digər bir qrup ölkədə risklər idarə edilə bilirsə, yanaşma olaraq daha çox məhdudiyyət strategiyası tətbiq olunur. Bu ölkələrə Türkiyə, Rusiya, Ukrayna, Belarus və sairə aid etmək olar.

Bəzi ölkələrdə nimesulidin istifadəsi məhdudlaşdırılmış olsa və ya qadağan edilsə də, bir çoxunda (İtaliya, Türkiyə, Polşa, Xorvatiya, Bolqarıstan, Macarıstan, Finlandiya, Yunanıstan, Meksika, Braziliya, Latviya, Litva, Malta, Kipr, Rusiya Federasiyası, Türkmənistan, Ukrayna, Özbəkistan, Belarus, Gürcüstan, Qazaxıstan, Qırğızıstan və s.) istifadəsinə icazə verilib.

O da vurğulanıb ki, bu qrup dərman vasitələri həkim resepti əsasında buraxılır və bir müalicə kursu çərçivəsində mümkün qədər qısa müddət ərzində və 15 gündən çox olmamaqla istifadə edilməlidir.

Aygün