Qarabağ münaqişəsinin ilk iki şəhidindən biri olan Bəxtiyar Quliyevin doğum günü münasibətilə anım tədbiri keçirilib.

TNS-in yerli müxbirinin xəbərinə görə, 1993-cü ildən sonra Bəxtiyar Quliyev ilk dəfə doğma yurdunda anılıb.

Ağdam rayonunun Şıxbabalı kəndində təşkil olunan mərasimdə şəhidin doğmaları ilə yanaşı, ictimaiyyət nümayəndələri, müharibə iştirakçıları və bir qrup kənd sakini iştirak edib. Tədbir iştirakçıları onun doğulduğu kənd qəbiristanlığındakı xatirə məzarını ziyarət edib, şəhidlərin ruhuna dualar oxuyublar.

Xatırladaq ki, 16 yaşlı Bəxtiyar 1988-ci ildə Ağdamdan Əsgərana təşkil olunan dinc yürüş zamanı Əli Hacıyevlə birlikdə ermənilər tərəfindən qətlə yetirilib.

Bəxtiyar Quliyevin məzarı doğulduğu Şıxbabalı kənd qəbiristanlığında olub. Ötən il onun məzar daşının qalıqları tapılsa da, basdırıldığı yer hələ ki, müəyyənləşməyib. Bu səbəbdən digər şəhid məzarlarının yanında ona anım-xatirə məzarı yaradılıb.

Bəxtiyar Quliyevin bacısı Nailə Quliyeva TNS-ə bildirib ki, keçən ilin oktyabrında onun qəbrinin qalıqları tapılıb: “Bilmirəm o an sevindim deyim, yoxsa kədərləndim. Ağlıyırdıq, amma qəribə bir hiss idi. Dərhal icazə alıb, bura gəldik. Gördüyünüz kimi qəbr daşları dağıdılmış vəziyyətdədir. Ermənilərə vəhşidən də betərdirlər”.

N.Quliyeva qardaşının xatirəsinin ilk dəfə doğma yurdunda anılmasının böyük təsəlli olduğunu vurğulayıb: "Atam cavan yaşlarında rəhmətə gedib. Bəxtiyar evin böyük uşağıydı. Atan rəhmətə gedən kimi Bəxtiyar bütün yükü öz çiyinlərinə götürdü. Bu günləri bizə yaşatdıqlarına görə Allah bütün şəhidlərimizə rəhmət eləsin, qazilərimizə cansağlığı versin. Allah Prezidentimizi qorusun!"

Ziya Əmirxanlı