Baş Prokurorluğun Mətbuat xidmətindən TNS-in sorğusuna cavab olaraq bildirilib ki, hadisə aprelin 2-si Ağdərə rayonu, Baş Güneypəyə kəndi ərazisində baş verib.

Belə ki, insana məxsus olması ehtimal edilən sümük fraqmentlərinin aşkar edilməsi barədə pokurorluğa məlumat daxil olub. Dərhal prokurorluq əməkdaşları tərəfindən kriminalist və ekspertin iştirakı ilə hadisə yerinə baxış keçirilib.

Baxış zamanı aşkar olunmuş sümük qalıqları ekspertiza və laborator müayinələrin aparılması məqsədilə müvafiq qaydada götürülüb, eləcə də digər zəruri prosessual hərəkətlər yerinə yetirilib.

Hazırda sümüklərin kimə məxsus olması istiqamətində zəruri prosessual hərəkətlər icra edilir.

Fakla bağlı Ağdam Rayon Prokurorluğunda araşdırma aparılır.

13:21

Ağdərə rayonunun Baş Güney kəndində kənd sakinləri insana məxsus olduğu ehtimal edilən skelet fraqmentlərini aşkarlayıb.

TNS-in xəbərinə görə, qalıqların Əsəddin Curu oğlu Novruzov və Qurban Ramazan oğlu Göyüşova məxsus olduğu ehtimal edilir.

Artıq Qurban Göyüşova məxsus qalıqlar ərazidən götürülərək, şəxsiyyətin müəyyənləşdirilməsi üçün ekspertizaya göndərilib. Əsəddin Novruza aid olduğu ehtimal olunan skelet qalıqları isə uçmuş evin altından hələ çıxarılmayıb. Əsir və itkin düşmüş, girov götürülmüş vətəndaşlarla əlaqədar Dövlət Komissiyasının üzvləri aprelin 4-də hadisə yerində olacaq və Əsəddin Novruzovun qalıqlarını götürəcəklər.

Qeyd edək ki, adı çəkilən şəxslər, 1992-ci il martın 12-də şəhid olublar. Onlara məxsus olduğu ehtimal edilən skelet fraqmentləri də şəhid olduqdan sonra dəfn edildikləri yerdə tapılıb. Hazırda faktla bağlı Ağdam Rayon Prokurorluğunda araşdırmalara başlanıb.

10:25

Ağdərədə insan sümüklərinə oxşar skeletlər aşkarlanıb.

TNS-in yerli müxbiri xəbər verir ki, skelet qalıqları Ağdərə rayon Baş Güney kəndi ərazisində tapılıb.

Qalıqları tapılan şəxslərin 1992-ci ildə şəhid olan Əsəddin Curu oğlu Novruzov və Qurban Ramazan oğlu Göyüşov olması ehtimal edilir.

Faktla bağlı araşdırma başlanıb.

Ziya Əmirxanlı