Media nümayəndələri Şuşada Qarabağ küçəsində dövlət-özəl tərəfdaşlığı layihələri çərçivəsində tikintisi aparılan iaşə obyektlərində olublar. Bu küçədə ümumilikdə müxtəlif təyinatlı 10 binanın inşası aparılır.

TNS-in yerli müxbirinin verdiyi xəbərə görə, Şuşa Şəhəri Dövlət Qoruğunun icraçı direktorunun müavini Vüqar Məhərrəmov bildirib ki, onların arasında mehmanxana, ofislər, iaşə obyektləri, Şuşa Qoruq İdarəsinin binası da var. Tikinti işləri yüksək keyfiyyətlə və şəhərin ümumi görünüşünə uyğun həyata keçirilir.

Bildirilib ki, küçədə Sovet dövründə inşa edilmiş çoxmənzilli binalar sökülüb, onların yerində şəhərin memarlıq üslubuna uyğun yeni binalar tikilir. Qoruq rəsmisi görülən işlərin başa çatacağı vaxtı da açıqlayıb: "2023-cü ildə başlanılan tikintinin 2025-ci ilin sonuna kimi yekunlaşması planlaşdırılır".

Media nümayəndələri Şuşa Müalicə-Sağlamlıq Mərkəzində də olublar. Tibb ocağı 90 çarpayılıqdır və 6 korpusdan ibarətdir. Mərkəzin Təcili Tibbi Yardım Stansiyası müasir standartlara cavab verən avadanlıqla təchiz olunacaq.

Xatırladaq ki, mərkəzin təməli 2021-ci il noyabrın 7-də Prezident İlham Əliyevin və birinci xanım Mehriban Əliyevanın iştirakı ilə qoyulub.

Ziya Əmirxanlı