“İtkin düşmüş şəxslər probleminin həlli: ailələrin “həqiqəti bilmək” hüququnun dəstəklənməsi” mövzusundakı beynəlxalq konfransın iştirakçıları Azərbaycanda akkreditə olunmuş diplomatik korpusla birgə Ağdərə rayonunun Sırxavənd kəndində Birinci Qarabağ savaşında vurulan tankın qalıqlarının tapıldığı əraziyə baxış keçiriblər.

TNS-in bölgə müxbiri xəbər verir ki, xarici qonaqlara tankın qalıqları və vurulmazdan əvvəlki halının fotoları təqdim olunub. Bildirilib ki, bu tank 1992-ci ildə Sırxavənd kəndi uğrunda gedən döyüşlər zamanı vurulub. Torpaqlarımız işğaldan azad edildikdən sonra tankın və içərisində olan hərbçilərimizin qalıqları tapılıb.

Qeyd edək ki, oktyabrın 2-də Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasının (Dövlət Komissiyası) və Beynəlxalq Qızıl Xaç Komitəsinin (BQXK) birgə təşkilatçılığı ilə “İtkin düşmüş şəxslər probleminin həlli: ailələrin “həqiqəti bilmək” hüququnun dəstəklənməsi” mövzusunda növbəti beynəlxalq konfrans təşkil olunub.

Ziya Əmirxanlı