Azərbaycan Yerüstü Nəqliyyat Agentliyinin (AYNA) nümayəndələri Naxçıvanda beynəlxalq yük daşımalarını həyata keçirən daşıyıcılarla görüşüblər.

Bu barədə TNS-in sorğusuna cavab olaraq AYNA-dan məlumat verilib.

Bildirilib ki, görüşdə daşıyıcılara beynəlxalq daşımalara hüquq verən xarici ölkələrin “İcazə” blanklarının və Beynəlxalq Nəqliyyat Forumu icazələrinin kvotası, verilməsi qaydaları izah edilib. Bildirilib ki, aparılan danışıqlarla milli daşıyıcıların tələbinə uyğun sayda icazələr mübadilə olunur və daşıyıcılara verilməsində şəffaflıq, əlçatanlıq və bərabərhüquqluluq təmin edilir.

Naxçıvanda fəaliyyət göstərən daşıyıcıların icazələrə əlçatanlığının artırılması məqsədilə AYNA tərəfindən 2024-cü il ərzində Muxtar Respublikaya 17 800 xarici ölkə “İcazə” blanklarının verildiyi, eləcə də Bakı, Xaçmaz və Yevlax KOB evlərində “İcazə” blanklarının alınması imkanı yaradıldığı diqqətə çatdırılıb.

Görüşdə daşıyıcılara İran, Çin, Orta Asiya və Avropa daşıma bazarları haqqında ətraflı məlumat verilib. Qeyd edilib ki, beynəlxalq yük daşımalarının coğrafiyasının genişləndirilməsi, milli daşıyıcıların bazar paylarının artırılması AYNA-nın prioritetlərindəndir. Daşıyıcılara, həmçinin yeni istiqamətlərdə fəaliyyətə başlamaqdan çəkinməmək tövsiyə edilib.

Müzakirələr zamanı daşıyıcılar müxtəlif ölkələrdə qarşılaşdıqları çətinliklərdən danışıblar. Qaldırılan məsələlər AYNA-nın nümayəndələri tərəfindən qeydə alınıb və həlli üçün müvafiq addımların atılacağı bildirilib.

Səfər çərçivəsində AYNA-nın nümayəndələri Dövlət Gömrük Komitəsinin əməkdaşlarının iştirakı ilə Sədərək, Culfa və Şahtaxtı sərhəd-keçid məntəqələrində də olacaqlar. Həmçinin qarşı tərəfə keçilməklə, Dilucu sərhəd-keçid məntəqəsində Türkiyənin, Culfa və Poldəşt sərhəd-gömrük keçid məntəqələrində İran tərəfinin aidiyyəti qurumlarının nümayəndələri ilə müzakirələr aparacaqlar.