Naxçıvan Muxtar Respublikası Prokurorluğunda əməliyyat müşavirəsi keçirilib
![](/upload/files/xeberler/Naxcivan/2024/07/15/17210536911065758974_1200x630.jpg)
Naxçıvan Muxtar Respublikası prokurorunun rəhbərliyi ilə Naxçıvan Muxtar Respublikası Prokurorluğunun mərkəzi aparatı və tabe rayon (şəhər) prokurorluqlarının əməkdaşlarının iştirakı ilə 2024-cü ilin birinci yarısında görülən işlərə dair əməliyyat müşavirəsi keçirilib.
Bu barədə TNS-ə Baş Prokurorluğun Mətbuat xidmətindən məlumat verilib.
Tədbirdən əvvəl Ümummilli Lider Heydər Əliyevin və şəhidlərin xatirəsi bir dəqiqəlik sükutla anılıb.
Müşavirədə çıxış edən Naxçıvan Muxtar Respublikasının prokuroru Sənan Paşayev müasir prokurorluq orqanlarının formalaşmasında və inkişafında Azərbaycan xalqının Ümummilli Lideri Heydər Əliyevin müstəsna xidmətlərindən, eləcə də Prezident İlham Əliyevin prokurorluq orqanlarına diqqət və qayğısından bəhs edib.
Sonra muxtar respublikada cinayətkarlığa qarşı mübarizə, ədalət mühakiməsinin həyata keçirilməsində iştirak, qanunların icra və tətbiq olunmasına nəzarət və qanunla müəyyənləşdirilmiş digər sahələrdə görülmüş işlərin vəziyyəti, qazanılmış nailiyyətlər, yol verilmiş nöqsanlar müzakirə edilib.
Sənan Paşayev bu ilin birinci yarımili ərzində prokurorluq və digər hüquq-mühafizə orqanlarının istintaq, təhqiqat və əməliyyat orqanlarının gördüyü işlərin vəziyyəti barədə ətraflı məruzə ilə çıxış edib. O, 2023-cü ilin birinci yarısı ilə müqayisədə muxtar respublikada qeydə alınmış cinayət hadisələrinin sayında azalma müşahidə olunduğunu, cinayətlərin açılma faizinin 97,9 faiz təşkil etdiyini bildirərək, həm prokurorluq, həm də digər hüquq-mühafizə orqanlarında təhqiqat və istintaqın keyfiyyətinin artırılması istiqamətində zəruri tədbirlərin görülməsinin vacibliyini vurğulayıb.
Həmçinin qeyd olunub ki, Naxçıvan Muxtar Respublikası prokurorluq orqanlarında müraciətlərə baxılması işinin keyfiyyətcə yeni səviyyəyə qalxması, müraciətlərə baxılması prosesi üzərində nəzarətin gücləndirilməsi, hüquqi təbliğat və profilaktiki söhbətlər nəticəsində 2023-cü ilin birinci yarımili ilə müqayisədə 2024-cü ilin müvafiq dövründə daxil olan müraciətlərin sayı əhəmiyyətli dərəcədə azalıb.
Vətəndaşların müraciətlərinə həssaslıqla yanaşılması, davamlı olaraq bu sahədə profilaktiki tədbirlərin həyata keçirilməsinin diqqətdə saxlanılması barədə tapşırıqlar verilib.
Məruzə ətrafında çıxışlar və müzakirələrdən sonra əməliyyat müşavirəsinə yekun vuran muxtar respublika prokuroru Sənan Paşayev, prokurorluq orqanlarının digər hüquq-mühafizə orqanları ilə əlaqəli şəkildə bundan sonra da üzərilərinə düşən vəzifələri layiqincə yerinə yetirəcəyinə əminliyini bildirib.