Naxçıvan Ali Məclisinin sabiq sədri Vasif Talıbovun oğlu Seymur Talıbov atasının muxtar respublikaya rəhbərliyi dövründə bir neçə vəzifə daşıyıb. Vasif Talıbovun istefası ərəfəsində Seymur Talıbov Naxçıvan Dövlət Universitetinin prorektoru vəzifəsindən çıxarılıb. Ancaq o hələ də Naxçıvan Muxtar Respublikası Ali Məclisinin deputatı, Naxçıvan Şahmat Federasiyasının sədridir.

TNS-in məlumatına görə, kiçik Talıbovun bu federasiyaya rəhbərliyi dövründə Naxçıvanda ölkə əhəmiyyətli və beynəlxalq şahmat turnirləri keçirilib. Xüsusilə Ulu Öndər Heydər Əliyevin doğum günü ərəfəsində hər il Naxçıvan Beynəlxalq Şahmat Festivalına ev sahibliyi edib.

Gözləmək olardı ki, Ümummilli Lider Heydər Əliyevin 100 illik yubileyi ərəfəsində Seymur Talıbovun rəhbərlik etdiyi federasiya Naxçıvanda daha böyük bir beynəlxalq yarış təşkil edəcək. Bu, Talıbovların mənəvi borcu idi. Axı Vasif Talıbov özünü Naxçıvanda Ulu Öndərin davamçısı hesab edir, hər dəfə Ümummilli Liderlə bağlı  danışanda “kövrəlirdi”. Bundan başqa, bu ailəyə yaradılan şərait, göstərilən etimad da bu ölkədə heç kimə göstərilməmişdi. Vasif Talıbovun ötən əsrin 90-cı illərinin əvvələrindəki kiçik xidmətləri çox yüksək səviyyədə qiymətləndirilmişdi. Onlar bu dövlətə ömürlərinin sonuna qədər borcludurlar.

Təəssüf ki, gözlənilən olmadı. Yox, yox, elə gözlənilən oldu. Seymur Talıbovun rəhbərlik etdiyi Şahmat Federasiyası bu il beynəlxalq turnir, əvvəllər öyünə-öyünə dedikləri şahmat bayramını təşkil etməyəcək. Naxçıvan Muxtar Respublilasının Şahmat Federasiyası Ulu Öndərimizin 100 illik yubileyinə həsr olunan muxtar respublika turniri keçirəcək. Beynəlxalq festival keçirmək üçün Seymur Talıbovun imkanları yoxdurmu? Əlbəttə var. Amma daha Ulu Öndərə həsr olunan beynəlxalq tədbirlər keçirmək Talıbovların nəyinə lazımdır? Onlar artıq muxtar respublikaya rəhbərlik etmir axı? Deməli, hər şey oturduqları kreslo üçün imiş. Keçirilən tədbirlər də, Ulu Öndərin doğum və anım günlərdindəki o “kövrək” anlar da.

Seymur Talıbov, budurmu sizin Ulu Öndərə sevgi və sayğınız?

Açığı bizim üçün bir məsələ də maraqlıdır. Görəsən, Vasif Talıbov hər il olduğu kimi bu il may ayının 10-da da Ulu Öndər Heydər Əliyevin Naxçıvan şəhərindəki abidəsini və Bakıdakı Fəxri Xiyabanı ziyarət edəcəkmi? Bu sualın cavabı bəzi qaranlıq məqamlara işıq salacaq.