İslam dünyasında xüsusi mənası olan günlərdən biri də Merac gecəsidir.

Merac gecəsi “Üç aylar”ın ikinci mübarək gecəsidir. Yüksəlmək mənasına gələn merac İslam peyğəmbəri Hz. Muhəmməd (s.ə.s)-in meraca yüksəldiyi gecənin adıdır. Merac gecəsi nə zaman qeyd olunur və fəziləti nələrdir?

İlahiyyatçı, Heydər məscidinin imamı hacı Rüfət Qarayev TNS-in bu barədə sualını cavablandırıb.

O bildirib ki, Merac gecəsi Rəcəb ayının 27-cü günü, bizim təqvimlə bu il fevralın 7-dən 8-nə keçən gecə qeyd olunur: “Bildiyiniz kimi, Rəcəb ayı mübarək “Üç aylar”dan biridir. Bu ay gəldiyi zaman Peyğəmbərimiz “Allahım, Rəcəb və Şabanı bizim üçün mübarək eylə, bizi Ramazan ayına çatdır”, - deyə dua edərmiş. Rəcəb ayı çərçivəsində xüsusi günlər var. O günlərdən biri də Rəcəb ayının 27-ci gecəsidir. Bu gecə bizim təqvimlə ayın 7-dən 8-nə keçən gecə sayılır. Ayın 8-i günü müsəlmanların oruc olması və gecəsində də Yaradana dua etmələri məqbul əməl hesab olunur. O gecə həm Merac gecəsi, eyni zamanda peyğəmbərizə peyğəmbərliyin verilməsi - “məbəs günü” hesab edilir. Hər iki tərəfdən yanaşdıqda, Merac gecəsinin gözəl dəyərləndirilməsinə ehtiyac var”.

İlahiyyatçı bildirib ki, Allah rəsulu o gecə Allahın hüzuruna gedir və bir çox hadisələlərlə rastlaşır: “Allahın hüzurunda ümməti üçün dualar etmiş olur. Gecənin fəziləti böyükdür. Rəbbimiz o gecənin bərəkətini gözəl şəkildə yaşamağı hər birimiz nəsib etsin, inşallah”.

Aygün