Beynəlxalq alimlər qrupu ABŞ və Hollandiyada tənhalığın ən yüksək səviyyədə olduğunu müəyyən edib. Üstəlik, əvvəllər düşünüldüyü kimi yaşlılar arasında deyil, daha çox orta yaşlı insanlar arasında müşahidə olunur.

TNS xəbər verir ki, “Aging & Mental Health” (AMH) jurnalında bununla bağlı araşdırma mətni dərc olunub.

Tədqiqatçılar Avropa, Şimali Amerika və Yaxın Şərqdəki 29 ölkədən 50-90 yaş arası 64 mindən çox insanın məlumatlarını təhlil ediblər. Əksər ölkələrdə tənhalıq yaş artdıqca çoxalsa da, bu göstəricinin yüksək olduğu ABŞ-də əks tendensiya müşahidə olunub: 45-65 yaşlı insanlar özlərini yaşlı insanlara nisbətən daha tənha hiss edirlər.

Emori Universitetinin professoru Robin Riçardsonun sözlərinə görə, insanların yaşlandıqca daha da tənhalaşdıqlarına dair ümumi bir inanc var. Lakin ABŞ-də bunun əksinədir - tənhalıq orta yaşda zirvəyə çatır.

İşsizlik, həyat yoldaşının olmaması, depressiya və sağlamlıq problemlərinin tənhalığın səbəbləri olduğu aşkar edilib, lakin onların təsiri ölkələr arasında çox fərqlidir.

Tədqiqat həmçinin tənhalığın səbəblərinin təxminən 20%-nin izah edilə bilməyəcəyini və demək olar ki, hamısının orta yaşlarda baş verdiyini müəyyən edib. Alimlər bunun səbəbini bu yaşda olan insanların eyni vaxtda yüksək iş yükü, uşaqlara və yaşlı valideynlərə qayğı göstərmələri, eyni zamanda ünsiyyət və şəxsi həyat üçün boş vaxt çatışmazlığı yaşamaları ilə izah edirlər.

“Biz tənhalığı yaşlılar və ya yeniyetmələr üçün problem kimi qəbul edirik, lakin orta yaşlı insanlar tez-tez unudulan həssas qrupdur", - Çilidən olan tədqiqatın həmmüəllifi Esteban Kalvo bildirib.

Kalvonun fikrincə, tənhalıqla mübarizə aparmaq üçün xüsusi tədbirlərə ehtiyac var: psixoloji yardımdan tutmuş işsizlərə və ya tək yaşayanlara dəstəyə qədər.

Müəlliflər tənhalığın qocalığın qaçılmaz yoldaşı olmadığını, konkret həyat şəraitinin nəticəsi olduğunu vurğulayır.

Əgər ölkələr öz vətəndaşlarının mədəni və sosial xüsusiyyətlərini nəzərə alarsa, bu problem daha səmərəli həll edilə bilər.