Bu gün dünyada əksər məmurlar, hətta dövlət başçıları sosial şəbəkələrdən istifadə edirlər. 

Azərbaycan Prezidenti İlham Əliyev və Birinci vitse-prezident Mehriban Əliyevanın da sosial şəbəkə hesabları var.

Maraqlıdır, Nazirlər Kabinetinə daxil olan mərkəzi icra hakimiyyəti orqanlarının hansının rəhbəri sosial şəbəkə hesabına malikdir

TNS xəbər verir ki, Modern.az bunu araşdırıb.

Rəqəmsal inkişaf və nəqliyyat naziri Rəşad Nəbiyev sosial şəbəkədə aktivdir. Onun  “X” və  "Facebook" hesabları var.  Onu "X"də 7425, "Facebook"da isə 12203 nəfər izləyir.

Elm və təhsil naziri Emin Əmrullayev də sosial şəbəkədə olduqca fəaldır. Onun "Facebook", "İnstagram" və “X” hesabları mövcuddur. Naziri "Facebook"da 108.428, "İnstagram"da 56,6 min, “X”də isə 20 mindən çox adam  izləyir.

Gənclər və idman naziri Fərid Qayıbov sosial şəbəkələrdə paylaşımlar edən məmurlardandır. Onu "Facebook"da 4495 nəfər, "İnstagram"da isə 13,9 min nəfər izləyir. 

Energetika naziri Pərviz Şahbazovun “X” hesabı var, burada onu sadəcə 2944 nəfər izləyir. 

Xarici işlər naziri Ceyhun Bayramov sosial şəbəkələrdə olduqca geniş izləyici kütləsinə malikdir. Belə ki, onu “Facebook”da 58687 nəfər izləyir. “X” sosial şəbəkəsində isə nazirin izləyici sayı 189,1 min nəfərdir. 

İqtisadiyyat naziri Mikayıl Cabbarov da sosial şəbəkələrdə geniş izləyici auditoriyasına sahibdir. Onu “Facebook”da 53720, “X” sosial şəbəkəsində isə 23,2 min nəfər izləyir. 

Kənd təsərrüfatı naziri Məcnun Məmmədovun “X” hesabını 479 nəfər izləyir.

Mədəniyyət naziri Adil Kərimlinin "Facebook" hesabı var və onu burada 1274 nəfər izləyir.

Ailə, Qadın və Uşaq Problemləri üzrə Dövlət Komitəsinin sədri Bahar Muradovanın "Facebook", "İnstagram" və “X” hesabları var. Onu "Facebook"da 4.978, "İnstagram"da 764, “X”də isə 2,010 nəfər izləyir.

Diasporla İş üzrə Dövlət Komitəsinin sədri Fuad Muradov da sosial şəbəklərdən aktiv istifadə edən məmurlardandır. Onu "Facebookd"da 43.401, “X” hesabında isə 10000 nəfər izləyir.

Dini Qurumlarla İş üzrə Dövlət komitəsinin sədri Ramin Məmmədov "Facebook"dan istifadə edir. Onu burada 7.460 nəfər izləyir.

Dövlət Şəhərsalma və Arxitektura Komitəsinin sədri Anar Quliyevin iki sosial şəbəkə hesabı - "Facebook" və “X”. Komitə sədrinin "Facebook" izləyicilərinin sayı 1771, “X” izləyicilərinin sayı isə 985 nəfərdir.

Dövlət Miqrasiya Xidmətinin sədri Vüsal Hüseynov "Facebook"da 29.909 izləyiciyə malikdir. Onun “X”də 2.470 nəfər izləyicisi var.

Dövlət Turizm Agentliyinin sədri Fuad Nağıyev "Facebook" işlədir və burada onu 1058 nəfər izləyir.