“Azərbaycan regionun və eyni zamanda Avropanın enerji təhlükəsizliyinin formalaşmasında yeni alternativ mənbədir. Ölkəmiz artıq Avropa qitəsinə yalnız xam nefti ilə deyil, eyni zamanda 2020-ci ilin sonuncu günündən etibarən öz mavi qazı ilə çıxır”.

Bunu TNS-a açıqlamasında deputat, iqtisadçı alim Vüqar Bayramov Bakıda keçirilən Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü görüşünü şərh edərkən deyib.

O bildirib ki, artıq Azərbaycanın mavi qaz ixrac etdiyi 12 ölkədən 10-u Avropa qitəsində yerləşir. Deputat bu amilin Azərbaycanın Avropanın və bütövlükdə regionun enerji təhlükəsziliyinə verdiyi töhfəni göstərən əsas faktorlardan olduğunu deyib: “Azərbaycanın mavi qaz hasilatının artması müşahidə olunur. 2024-cü ildə Azərbaycan tarixində ilk dəfə olaraq mavi qaz hasilatı 50 milyon kubmetrdən çox oldu. Bu da daha çox ixrac imkanları deməkdir. 25 milyon kubmetrdən artıq mavi qaz ixrac olunub. Onun əhəmiyyətli hissəsi Avropa bazarına ixrac olunan mavi qazdır.

Təbii ki, Bakıda Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü görüşünün keçirilməsi bir tərfədən Azərbaycanın regionun enerji təhlükəsizliyində olan rolunu göstərən faktorlardan biridir. Digər tərəfdən bu, həm də xüsusilə enerji əməkdaşlığının genişləndirilməsi baxımından yeni imkanlar kimi xarakterizə olunur. Çünki burda həm görülən işlər, həm perspektiv olaraq həyata keçiriləcək layihələr reallaşır, müzakirə olunur. Azərbaycan Cənub Qaz Dəhlizi vasitəsilə, həm də daxili şəbəkələrdən istifadə etməklə Avropada daha çox ölkələrə mavi qaz nəql edir. Xüsusilə də Yunanıstan-Bolqarıstan Qaz İnterkonnektorunun istifadəyə verilməsi Azərbaycan mavi qazının daha çox ölkələrə çatdırılmasına imkan yaratdı. Bu konteksdən sonuncu görüş də həm imkanların müzakirə olunması, həm görülən işlərin qiymətləndirilməsi baxımından vacibdir. Bu da ondan xəbər verir ki, Azərbaycanın regionun enerji təhlükəsizliyindəki rolu növbəti dövlərdə daha da güclənəcək”.

Aygün