Mersisayd derbisi təxirə salına bilər
06:22 - 07 Dekabr 2024
Futbol üzrə İngiltərə Premyer Liqasının XV turunda “Everton” və “Liverpul” arasında baş tutacaq Mersisayd derbisi təxirə salına bilər.
TNS xəbər verir ki, bu barədə “Hayters TV”nin “Liverpul” üzrə müxbiri Nazira Yusuf sosial şəbəkədə yazıb.
“Everton”, “Liverpul” və Mersisayd Polisi arasında sabahkı derbidə “Darra” fırtınasının potensial təsiri ilə bağlı müzakirələr davam edir. Saatda 70 milə qədər külək proqnozu azarkeşlərin təhlükəsizliyi ilə bağlı narahatlıq yaradır”, – jurnalist qeyd edib.
Onun sözlərinə görə, hər iki klub matçın keçiriləcəyini ümid edir.
Eyni zamanda, “Liverpul” azarkeşləri matç günü güclü külək səbəbindən yola daha çox vaxt ayırmağa çağırıb. Onlara hava proqnozunu və nəqliyyat məlumatlarını izləmək tövsiyə olunub.
