O, 2015-ci ilin iyulunda Şamaxı rayonundan hərbi xidmətə yola salınmışdı. Doqquz ay idi ki, hərbi xidmətdə olan Kaçayev 2016-cı ilin iyulunda xidmətini başa vuracaqdı... 

Tərtər rayonu istiqamətində Azərbaycan-Ermənistan qoşunlarının təmas xəttində döyüş tapşırığını yerinə yetirən zaman düşmənin açdığı atəş nəticəsində şəhid oldu.  

TNS xatırladır ki, Azərbaycan Ordusunun parlaq tarixi qələbələrindən olan şanlı Aprel döyüşlərindən 9 il ötür. 2016-cı il aprelin 2-də Ermənistan silahlı qüvvələrinin təxribatlarına cavab olaraq, Azərbaycan Ordusu sürətli əks-hücum əməliyyatı ilə düşməni ağır məğlubiyyətə uğradıb, Füzuli, Cəbrayıl və Ağdərə rayonlarının işğal altındakı ərazilərinin 2000 hektardan çox hissəsini azad edib. Azərbaycan Ordusu dördgünlük Aprel döyüşləri ilə 23 ildən sonra xalqımıza qələbə sevinci yaşadıb.

Lakin bu sevinc şəhidlərimizlə əldə edilib. Həmin şəhidlərdən biri də Kaçayev Samir Ziyəddin oğludur. S. Kaçayev Şirvan zonasında anadan olmuşdu - Şamaxının Çuxuryurd kəndində. Özü də "Bişkek protokolu"nun gerçəkləşdirildiyi 1994-cü ilin mayında. Ancaq Azərbaycan və Ermənistan arasındakı bu atəşkəs sadəcə simvolik xarakter daşıdı. Yoxsa, bu qədər "iyirmi ikilər" almazdı Samirləri cənginə...

O 22 il ki, həyatına bu qədər illərə sığdıra bilməyənləri qurban verməyi bacardı. O 22 il ki, neçə-neçə 21-ləri, 18-ləri, yazılması çətin olsa da, hələ 1 yaşına çatmayan körpələri belə, gülləyə tuş gətirdi.

Samir də o 21-lərdən idi. 

2011-ci ildə bitirmişdi orta məktəbi. Elə həmin il də Azərbaycan Dövlət Rəssamlıq Akademiyasının heykəltaraşlıq fakültəsinə daxil olmuşdu. Tələbəlik illərində bir sıra tədbirlərdə, sərgilərdə əsərləri ilə iştirak etmişdi, həm yerli, həm xarici. 2014-cü ildə “AZNAR” sərgisində, “Milli Dəyərlər” sərgisində iştirak etmişdi. 2015-ci ilin noyabr ayında "Tolerant Azərbaycan Gənci" fondunun layihəsində heykəltaraşlıq üzrə II yerin qalibi də oldu. 2014-2015-ci illərdə “Hamı Birlikdə” adlı sərgidə, Heydər Əliyev Fondununun, “Bakı 2015” - I Avropa Oyunlarının tədbirlərində, Fransa, Türkiyə, İsveçrə kimi xarici sərgilərdə də iştirakı ilə yadda qalmağı bacarmışdı. 

İndi də heykəltaraşın əsərləri şəxsi kolleksiyalarda saxlanılır.

Dostları onu belə xatırlayır: "Çiçək torpaqda gözəldir, qoparmayın, - deyirdi. Yuvası olmayan heyvanlara hər gün yemək verirdi ki, ölməsin. Başqalarına zərər verir deyə öldürülən heyvanları qoruyurdu. Yəni düşünün ki, necə bir mələkdi, indi həqiqətən də mələk oldu".

Müsahibələrində anası Əminə xanım isə oğlu haqqında bunları deyir: "İndi oturub danışdığı hər sözü, hər söhbəti çözələyirik ki, bəlkə içərisindən bir məna tapaq. Oğlumun istədiyi qızın da adını bilmədim ki, bir ona baxım. Gedəndə arxasınca su atdım ki, balam salamat qayıtsın. İyul ayında qayıdacaqdı. Mən elə bilirdim, oğlumun cəmi üç dostu var. Buraya Akademiyadan 150 nəfər gəlmişdi. Bilmirdim ki, balamı bu qədər istəyən var, qarşımda baş əydilər…"

Azadə Yolçu