Fövqəladə Hallar Nazirliyinin “112” qaynar telefon xəttinə Bərdə şəhəri, Təbriz küçəsində yaşayış binasının eyvanının uçması barədə məlumat daxil olub.

FHN-dən TNS-ə verilən məlumata görə, dərhal əraziyə nazirliyin Qarabağ Regional Mərkəzinin və Dövlət Yanğından Mühafizə Xidmətinin qüvvələri cəlb olunub.

Hadisə yerində əməliyyat şəraiti qiymətləndirilərkən ikimərtəbəli yaşayış binasının 2-ci mərtəbəsinin eyvanının uçması nəticəsində 1990-cı il təvəllüdlü Əliyeva Turanə Saleh qızının dağıntı altında qaldığı müəyyən olunub.

Nazirliyin qüvvələri operativ xilasetmə tədbirləri sayəsində dağıntı altında qalan qadını xilas edilərək təcili tibbi yardım briqadasına təhvil verilib.

Təhlükəsizlik tədbirləri çərçivəsində bina sakinləri təxliyə edilib.

12:26

Qarabağ Regional Təhsil İdarəsi Bərdədəki hadisə ilə bağlı açıqlama yayıb.

Qurumdan TNS-ə bildirilib ki, Bərdə şəhər 4 nömrəli körpələr evi-uşaq bağçasının inzibati binasında heç bir uçqun və dağıntı halı qeydə alınmayıb. Hadisə müəsssiənin qarşısında yerləşən yaşayış binasının eyvan hissəsində baş verib. Bağçanın binasına hər hansı bir zərər dəyməyib.

11:38

Bərdədə uşaq bağçasında uçqun olub.

TNS-in yerli müxbirinin məlumatına görə, şəhərin Təbriz küçəsində yerləşən 4 saylı uşaq bağçası-körpələr evinin eyvanı uçub.

Bir qadın uçqun altında qalıb. Hadisə yerinə aidiyyəti qurumların əməkdaşları cəlb olunub. Qadın dağıntılar altından çıxarılaraq, xəstəxanaya çatdırılıb.

Faktla bağlı araşdırma aparılır.

Ziya Əmirxanlı