Məlum olduğu kimi, Almaniya Prezidenti Frank-Valter Ştaynmayer Azərbayacan səfər edib. Prezident İlham Əliyev almaniyalı həmkarı ilə birlikdə mətbuata bəyanatında bu səfəri iki ölkənin əlaqələrinə yeni müsbət təkan verəcəyini bildirib.

Maraqlıdır, bundan sonra iki dövlətin münasibətləri necə olacaq?

TNS-in bu barədə sualını cavablandıran Milli Məclisin deputatı Aydın Hüseynov deyib ki, Azərbaycan beynəlxalq əlaqələrini genişləndirmək kursunda uğurlar əldə edib, ölkəmizin əməkdaşlıq coğrafiyası genişlənir: “Artan nüfuzu fonunda Azərbaycan Avropanın aparıcı ölkələri ilə də təmaslarını inkişaf etdirir. Bu siyasət öz bəhrəsini verməkdədir, artıq bir çox dövlətin Azərbaycana olan marağı artıb, əməkdaşlıq əlaqələrinin yaradılmasına çalışan ölkələrin sayı çoxalıb. Azərbaycan Avropanın ən çox inkişaf etmiş dövləti olan Almaniya üçün də cəlbedici ölkədir”.

Deputat xatırladıb ki ki, Azərbaycan-Almaniya münasibətlərin iki əsrlik tarixi var: “1863-cü ildə "Siemens qardaşları" firması tərəfindən Gədəbəy ərazisində iri misəritmə və kobalt  zavodu qurulub. XX əsrin əvvəllərinədək bu zavodlarda xeyli sayda insan işlə təmin edilib, əhalinin maddi rifahı yüksəlib. İndiki Göygöl və Şəmkir rayonlarında alman koloniyaları yaranıb. Almaniya Azərbaycanın müstəqilliyini ilk tanıyan ölkələrdəndir. Diplomatik münasibətlərin yaranmasından sonra Azərbaycan və Almaniya arasında əlaqələr mütəmadi olaraq inkişaf edib. Bu illər ərzində iki ölkə arasında müdafiə, siyasi, təhlükəsizlik, terrorizçuluğa qarşı mübarizə sahəsində uğurlu əməkdaşlıq aparılıb. Azərbaycan Almaniya üçün neft-qaz ölkəsi kimi beynəlxalq layihələrdə mühüm tərəfdaşlardandır. Azərbaycanda hazırda 100-ə yaxın alman müəssisəsi fəaliyyət göstərir. Almaniya Prezidenti Frank-Valter Ştaynmayerin Azərbaycana rəsmi səfəri və qarşılıqlı əməkdaşlıq perspektivləri ilə bağlı Prezident İlham Əliyevlə apardığı müzakirələr də bu səpkidə dəyərləndirilə bilər”.

Aydın Hüseynov diqqətə çatdırıb ki, Azərbaycan gələcək illərdə ticarət dövriyyəsini şaxələndirilməsi ilə bağlı daha fəal addımlar atmağı hədəfləyir: “Xüsusilə, Almaniya şirkətlərinin böyük təcrübəsi olan bərpaolunan enerji sahəsində müəyyən işlər görüləcək. Ölkəmizin bu sahədə çox böyük proqram və planı var. Prezident İlham Əliyevin də vurğuladığı kimi, 2030-cu ilə qədər bərpaolunan enerji növlərinin istehsal gücünü 6 qiqavata çatdırmaq fikrindəyik. Bu enerjinin bir hissəsi Avropaya ixrac ediləcək. Keçən il Azərbaycanın ev sahibliyi etdiyi COP29 beynəlxalq iqlim konfransında bu istiqamət üzrə də Almaniya ilə çox fəal əməkdaşlığımız olub. Prezident İlham Əliyevin uğurlu enerji siyasəti nəticəsində ölkəmizin prioritetlərindən biri bərpaolunan enerji ilə bağlı yeni layihələrin həyata keçirilməsidir”.

Deputat bildirib ki, artıq bu sahədə Azərbaycanla Almaniya arasında real əməkdaşlıq mövcuddur: “Almaniyanın nüfuzlu şirkətləri Azərbaycanın təşəbbüskar olduğu bu layihələrə sərmayə yatırır. Bu, Azərbaycan üçün geniş imkanlar deməkdir. Bərpaolunan enerji ixracatını artırmasını nəzərdə tutan Azərbaycanda 2030-cu ilə qədər daxili istehlakın 30 faizi alternativ mənbələrdən əldə edilən enerji hesabına ödəniləcək. Bu fikirlər Prezident İlham Əliyevlə Almaniya Prezidenti Frank-Valter Ştaynmayerin mətbuata birgə bəyanatında da səsləndirib. Azərbaycan bərpaolunan enerji mənbələri üzrə yüksək potensiala malik olan ölkələrdəndir. Ölkəmizin bərpa olunan enerji mənbələrinin texniki potensialı quruda 135 QVt, dənizdə 157 QVt-dır. Bərpa olunan enerji mənbələrinin iqtisadi potensialı 27 QVt, o cümlədən, külək enerjisi üzrə 3 000 MVt, Günəş enerjisi üzrə 23 000 MVt, bioenerji potensialı 380 MVt, dağ çaylarının potensialı 520 MVt həcmində qiymətləndirilir. Enerji resursları ilə zəngin olmasına və dünyada enerji resurslarının ixracatçısı kimi tanınmasına baxmayaraq, Azərbaycanda bərpaolunan enerji mənbələrindən istifadə hər zaman diqqət mərkəzində olub”.