ABŞ-dən sonra İsrail də İranı bombalayacağı ilə hədələməyə başlayıb.

Bu iki müttəfiq ölkə İrana həqiqətən hücum edə bilərmi? İran bu dəfə həqiqətən parçalana bilərmi?

TNS-in suallarını cavablandıran siyasi şərhçi, “Orta Doğu” Araşdırmalar Mərkəzinin rəhbəri Sədrəddin Soltan bildirib ki, İranın bombalanması məsələsi hər zaman gündəmdədir: “Əfqanıstanda, son zamanlar HƏMAS-a, “Hizbullah”a, Yəməndə Husilərə və Suriyada Bəşər Əsədə qarşı əməliyyatlar başlayanda da bu məsələ gündəlikdə olub.

Amma İran hakimiyyəti İraqdakı Səddam Hüseyn, Suriyadakı Bəşər Əsəd, yaxud HƏMAS, “Hizbullah” deyil. Bu hakimiyyət vəziyyət çətinə düşəndə danışıqlara gedəcək. Məsələn, 1988-ci ildə İranla İraq arasında atəşkəsin imzalanması ilə bağlı Xomeyniyə təkliflər irəli sürülmüşdü. O zaman Xomeyni təklifləri “zəhər içirəm”, - deyib, qəbul etdiyini bildirmişdi. İndiyə qədər də, sülh sazişi imzalanmamasına baxmayaraq, həmin atəşkəs rejiminə əməl olunur”.

Siyasi şərhçi deyib ki, ötən gün İranın xarici işlər naziri Abbas Araqçinin “İranın nüvə silahı yoxdur. Onu əldə etmək niyyətində belə deyil”, - kimi açıqlaması ABŞ başda olmaqla, Qərbə ismarıc idi: “Yəni, nüvə silahımız yoxdur və gəlin, növbəti məsələni müzakirə edək. Odur ki, İranın bombalanacağı ehtimalı azdır.

İran hakimiyyəti razılaşmayacağı halda, ola bilsin ki, Tehranın nüvə obyektləri və raket bazaları vurulsun. Bu isə Tehran hakimiyyəti üçün çox öldürücü olar və İranın cavab reaksiyası verməsinin qaşısını ala bilər.

İranın parçalanma məsələsi ilə bağlı hələlik dünyanın aparıcı güclərinin açıqlamaları, ismarıcları belə yoxdur. Bu baxımdan İranda bu gün üçün əsas məsələ Qərblə danışığa getmək və şərtləri qəbul etməkdir”.