Ermənistan atəşkəsi tez-tez pozur, müxtəlif təxribatlar törədir. Sülhdən danışan Ermənistanın bu addımları nədən xəbər verir? 

Mövzu ilə bağlı TNS-ə danışan politoloq Natiq Miri bildirib ki, atəşkəsin bu şəkildə pozulması konkret siyasi məqsədlərə xidmət edir: “Birinci növbədə Azərbaycan-Ermənistan münaqişəsini dünyanın gündəmində saxlayır və diqqətin Ermənistana yönəlməsini təmin edir. Bu da Ermənistan hökuməti üçün çox vacibdir. Digər tərəfdən, sərhəddə üçüncü qüvvələrin, yəni Avropa İttifaqının “Müşahidə Missiyasının” durmasının guya nə qədər doğru qərar olduğunu əsaslandırır. Guya atəşkəs var və bununla potensial müharibə ehtimalının qaldığını göstərmək istəyirlər. Üçüncü məsələ isə Ermənistan hökumətinin maraqları çərçivəsində olan bir hadisədir. Yenidən silah səslərinin eşidilməsi Ermənistan ictimaiyyətini hər zaman qorxu altında yaşamağa vadar edir. Bu da gələcəkdə Azərbaycanın şərtlərini bir-bir qəbul edərkən, Ermənistan hökumətinin nə qədər haqlı olduğunu əsaslandırmağa yönəlikdir. Çünki Ermənistan növbəti parlament seçkilərinə məhz “Ya sülh, ya müharibə” şüarı ilə gedəcək. Ermənistan anaları bu gün övladlarını müharibəyə göndərmək istəmədikləri üçün sülh məcburi seçimə çevrilir. Alternativ qüvvələr yeni bir şey vəd etmir. Qarabağ kimi qeyri-populyar məsələlər səsləndirilir ki, bu da müharibə anlamına gəlir. Ona görə də insanlar bu gün alternativə səs verib, övladlarını müharibəyə göndərməkdənsə, ən azından sülh vəd edən indiki Paşinyan hökumətinə səs verməyi seçirlər”.

Politoloq vurğulayıb ki, Ermənistanda ictimaiyyəti daim müharibə qorxusu altında saxlamaq üçün atəşkəsin pozulmasına ehtiyacı var: “Zaman-zaman bu cür atəşkəsin pozulması, həm də Ermənistanın Azərbaycana qarşı beynəlxalq ictimai rəy yaratması üçün lazımdır. Çünki Ermənistan atəşkəsi pozmadığını iddia edir. Pozulsa da, bunu Azərbaycanın etdiyini bəyan edir. Onların yalanlarını təsdiqləmək üçün Avropa İttifaqının Müşahidə Missiyası var. Bu cür dezinformasiyaları hər zaman təsdiqləməklə Azərbaycanı ittiham olunacaq tərəfə çevirməyə çalışırlar”.

Natiq Miri onu da qeyd edib ki, Azərbaycana qarşı ciddi bir müahribənin olma ehtimalı minimumdur: “Çünki Ermənistanın hələ müharibə üçün potensialı yoxdur. Bunun üçün ciddi şəkildə fiziki qüvvəyə, strateji silahlara və qüdrətli iqtisadiyyata ehtiyac var. Ermənistanın isə bu imkanları yoxdur. Yəni, baş verənləri sadəcə təxribat xarakterli hadisə kimi dəyərləndirmək lazımdır”.

Aygün