Türkiyənin Azərbaycandakı yeni səfiri kimdir? - DOSYE
Xəbər verildiyi kimi, Birol Akgün Türkiyənin Azərbaycanda yeni səfiri təyin olunub.
TNS yeni səfirin dosyesini təqdim edir:
Siyasətçi, professor, akademik, tədqiqatçı yazıçı, QHT rəhbəri, Türkiyənin Maarif Fondunun prezidenti olan Birol Akgün 25 mart 1968-ci ildə Manisa vilayətinin Soma rayonunda anadan olub. İbtidai və orta təhsilini yaşadığı rayonda alan Akgün 1993-cü ildə Ankara Universitetinin Siyasi elmlər fakültəsinin dövlət idarəçiliyi bölməsini bitirib.
1994-cü ildə rəsmi təqaüdlə magistr təhsili almaq üçün ABŞ-yə gedib. Magistr təhsilini başa vurduqdan sonra Türkiyəyə qayıdıb, Konyadakı Səlcuq Universitetinin İqtisadiyyat və idarəetmə fakültəsinin beynəlxalq əlaqələr departamentində işləməyə başlayıb. 2001-ci ildə dosent, 2009-cu ildə professor olub.
O, hazırda Yıldırım Beyazıt Universitetinin Siyasi elmlər fakültəsinin beynəlxalq əlaqələr departamentinin rəhbəri, Maarif Vəqfinin İdarə Heyətinin sədridir.
