BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində Bakıya minlərlə xarici qonaq gəlib.

Gələn qonaqlar arasında dövlət və hökumət rəhbərləri, araşdırmaçılar, sahəsi üzrə mütəxəssis olanlar, jurnalistlər, blogerlər, bütün dünyada tanınan insanlar var. Artıq blogerlərin Azərbaycan, Bakı ilə bağlı müxtəlif paylaşımları var və milyonlarla izləyici ölkəmizlə bağlı məlumatlar əldə edir.

COP29 ölkəyə turistlərin cəlbi baxımından da dəyərləndirilir.

Dövlət Turizm Agentliyi tərəfindən COP29 çərçivəsində turizm üzrə ölkənin dayanıqlılıq təcrübələri “Yaşıl Zona”da yerləşən destinasiya stendində təqdim olunur. 

200 kvadrat metrlik sahədə yerləşən stenddə xarici qonaqlara və media nümayəndələrinə Azərbaycanın turizm potensialı haqqında məlumatlar təqdim olunur, Azərbaycanın turizm imkanlarını əks etdirən interaktiv xəritə və ölkə ilə bağlı promo videolar nümayiş etdirilir.

Stenddə Azərbaycanın milli mətbəxi, çay dəstgahı mədəniyyəti, milli şirniyyatlar, yerli şərablar, o cümlədən yerli biomüxtəlifliyin qorunması prinsipinə əsaslanan “Slow food travel” konsepsiyası barədə təqdimat və dequstasiyalar keçirilir. 

Ziyarətçilərə, həmçinin xalçaçılıq, corab toxuma, yun əyirmə, keramika üzərində rəsmlər, təkəlduz və misgərlik kimi sənətlər üzrə əl işləri nümayiş etdirilir.

Azərbaycanın görməli yerlərinə virtual səyahət üçün nəzərdə tutulan VR (virtual reallıq) hissəsində qonaqlara Xınalıq, Yanardağ, Atəşgah, İçərişəhər, Şəki Xan Sarayı, Göygöl və digər tarixi və mədəni məkanlara canlı şəkildə səyahət etmək imkanı yaradılır.

Təqdimat zonasında 10 gün ərzində ziyarətçilər üçün hər gün dağ yürüşü, quş müşahidəçiliyi kimi ekoturizm məhsulları, təbiət turizmi potensialı, işgüzar tədbirlər üzrə imkanlar, Azərbaycanın UNESCO-nun Ümumdünya İrs Siyahısına daxil edilən maddi mədəni irs nümunələri və ölkəmizin turizminin təbliğinə həsr olunmuş müxtəlif təqdimatlar təşkil olunacaq.

COP29 çərçivəsində Dövlət Turizm Agentliyi tərəfindən Abşeron və Altıağac Milli Parklarında turistlərə xidmət keyfiyyətinin artırılması üçün istiqamətləndirici işarələr və məlumatlandırıcı lövhələr quraşdırılıb, həmçinin parklarda turist xidmətlərinin təkmilləşdirilməsi istiqamətində yüngül infrastruktur yerləşdirilib.

Həmçinin COP29 tədbiri çərçivəsində şəhərimizi səyahət edən ziyarətçilərə tədbirlər və  ölkəmizin turizm imkanları haqqında məlumatın verilməsi məqsədilə Bakı şəhəri üzrə  xüsusi ayrılmış nəqliyyat qovşaqları üzərində 5 ədəd mobil turizm informasiya mərkəzi quraşdırılıb. Ümumilikdə sayları 8-ə çatan turizm informasiya mərkəzləri (Nizami küçəsində “Nərgiz” TM-nin arxası, Dənizkənarı Milli Parkda “Park Bulvar” TM-nin arxası, Albert Aqarunov küçəsi, “Koroğlu” metro stansiyası (Bakı Stadionu tərəfinə çıxış), Heydər Əliyev Sarayı, “Port Baku” TM-nin çıxışı, “Sea Breeze Resort” kompleksi, hava limanında Terminal 2) tədbir müddətində hər gün saat 10:00-dan 19:00-dək fəaliyyət göstərir.

Ümumiyyətlə, bu cür beynəlxalq tədbirlər ölkədə turizmin inkişafına hansı təsirləri göstərə bilir?

Mövzu ilə bağlı TNS-ə danışan turizm üzrə mütəxəssis Ceyhun Aşurov bildirib ki, COP29 çərçivəsində minlərlə insan Azərbaycana gəlib, bu da onlara canlı olaraq ölkəmiz, tariximiz, mətbəximiz, mövcud infrastrukturla tanış olmaq imkanı yaradıb: “Bu kimi beynəlxalq tədbirlərin ölkənin turizm məkanı kimi tanıdılmasında əhəmiyyəti böyükdür. Belə tədbirlərin ciddi təsirləri var. Gələn insanlar məmnun gedərlərsə, bura haqqında məlumatları öz ölkələrində də paylaşırlar. Beynəlxalq tədbirlərin Azərbaycanda keçirilməsinin təsirlərini növbəti illərdə çox aydın şəkildə görə bilirik. Reallıqda ölkəni turizm məkanı kimi yaxından hiss etmək növbəti illərdə daha çox xarici qonaqların gəlməsinə şərait yaradır”.

Onu da qeyd edək ki, noyabrın 20-də COP29 Sədrliyinin Fəaliyyət Gündəliyinə COP tarixində ilk dəfə olaraq daxil edilmiş "Turizm Sahəsində Təkmilləşdirilmiş İqlim Fəaliyyəti məqsədilə Qlobal Əməkdaşlıq" Təşəbbüsünün icrası məqsədilə Turizm Nazirlərinin Yüksək Səviyyəli Görüşü, turizmin iqlim dəyişikliyində yeri üzrə bir sıra panel müzakirələr və əlavə tədbirlər də keçiriləcək.

Aygün