Meksikada bir ay ərzində ikinci ölüm düşərgəsi aşkar edilib.

TNS xəbər verir ki, bu barədə "Financial Times" məlumat verib.

Düşərgəni itkin düşən meksikalıların qohumları tapıblar. Bu düşərgənin fəaliyyət göstərdiyi illərdə 120 min insan itkin düşüb. Son iki həftə ərzində Kolima ştatında ən azı 42 nəfərin qalıqları aşkar edilib. İtkin düşənlərin axtarışları hələ də davam edir.

Meksika hakimiyyəti təxminən il yarım əvvəl cəsədlərin dəfn olunduğu yeri tapsa da, bütün məlumatları ictimaiyyətdən gizlədib. Buna görə də itkin düşənlərin yaxınları özbaşına hərəkət etmək qərarına gəliblər. 2025-ci ilin martında yerli sakinlər yaxınlıqdakı ərazidə mindən çox paltar fraqmenti, eləcə də yandırılmış insan sümükləri tapıblar.

Qeyd edək ki, bir neçə ildir ki, Meksikada insanlar kütləvi şəkildə yoxa çıxırlar. Xəbərdə bunun hələ 2000-ci illərdə hökumətin kartellərə müharibə elan etməsi ilə başladığı vurğulanır. Tacirlər insanları işə cəlb edirlər, bununla razılaşmayanlar və ya uyğun gəlməyənlər sadəcə olaraq ucqar fermalarda öldürülür və onların bədənləri kimyəvi maddələrlə yandırılır.

Nəşrin məlumatına görə, kartel üzvləri ən çox Kolima ştatında insanları öldürürlər. O, Meksikanın mərkəzi şəhərlərindən ən uzaq hesab olunur. 2018-ci ildə ölkənin ən tanınmış insan alverçilərindən biri məhz burada saxlanılıb. Bildirilir ki, o, bir neçə gün sonra həbsxanada öldürülüb, onun məşğul olduğu cinayətkar fəaliyyət isə davam edib.