Konklav Vatikanda keçirilmiş ilk səsvermə turunda yeni Roma Papasını seçə bilməyib.

TNS “Vatican News”a istinadən xəbər verir ki, Sikstin kapellasının bacasından çıxan qara tüstü konklavın ilk səsvermə turunda Roma Papasını seçə bilmədiyini göstərib.

Qeyd edək ki, nəticənin elan olunmasını planlaşdırılandan iki saat çox gözləmək lazım gəlib. Sabah əlavə səsvermə raundları keçiriləcək və qərar qəbul edilənədək davam edəcək.

Xatırladaq ki, kardinallar yeni Papa seçilənə qədər xarici dünya ilə əlaqə saxlamayacaqlar.

21:27

80 yaşadək 133 kardinal konklavın – Roma Katolik Kilsəsinin yeni başçısının seçiləcəyi qapalı kardinal məclisin keçirildiyi Sikstin kapellasına daxil olub. “Extra omnes” (“hamı bayıra”) elan edilmiş formula ilə hər biri papa taxtına namizəd ola bilən kardinal-seçicilər xarici dünyadan təcrid olunublar.

TNS xəbər verir ki, bu barədə Müqəddəs Taxt-Tacın mətbuat xidməti məlumat yayıb.

Kapellada mobil və digər rabitə vasitələri söndürülüb. Məlumatları yaymamaq barədə and içdikdən sonra (mərasim “Vatican News” portalı tərəfindən yayımlanıb) artıq bağlı qapılar arxasında günün sonunadək ilk və yeganə səsvermə keçiriləcək.

Səhər Müqəddəs Pyotr kilsəsində konklavın uğuru naminə təntənəli messa keçirilib, ona yaşına (91) görə konklavda iştirak etməyən kardinallar kollegiyasının dekanı Covanni Battista Re başçılıq edib. O, öz moizəsində zamanın çətinliyini və bu anda kilsədən və “cəmiyyətin vicdanını oyatmalı olan” Roma Papasından böyük gözləntiləri qeyd edib.

Konklavda iştirak edən 133 kardinaldan 52-si avropalıdır. Fransiskin dövründə dövlət katibi (hökumət başçısı) vəzifəsini tutan italyan Pietro Parolin və İtaliya Yepiskoplar Konfransının rəhbəri Matteo Zuppi müəyyən dəstəyə malikdirlər.

Müqəddəs Pyotr meydanında inanclılar Sikstin kapellasında quraşdırılmış bacanın borusundan çıxan tüstünü görmək üçün toplaşırlar. Məhz ağ tüstü seçimin edildiyini xəbər verir. Təhlükəsizliyi təmin edən Roma iqtidarının məlumatına görə, meydanda 250 min nəfərədək insan gözlənilir. Bu, təxminən aprelin 26-da Roma Papası Fransiskin dəfn mərasiminə gələnlərin sayı qədərdir. Təhlükəsizliyin təmin edilməsinə 4 min polis və hərbçi, üç min könüllü cəlb edilib.