Qəzzada əməliyyatın yeni mərhələsi başlayır: ”Moraqa yolu”
İsrailin Baş naziri Benyamin Netanyahu HƏMAS-a təzyiqi artırmaq məqsədi ilə Qəzzada hərbi əməliyyatın yeni mərhələsini elan edib.
TNS xəbər verir ki, bu barədə o, “X” hesabında bildirib.
"Bu gecə Qəzzada biz taktikanı dəyişdik. İsrail ordusu əraziləri ələ keçirir, terrorçuları vurur, infrastrukturu məhv edir. Biz daha bir iş görürük - "Moraqa Yolu"nu ələ keçiririk. Bu, ikinci Filadelfiya, əlavə Filadelfiya dəhlizi olacaq", - Netanyahu qeyd edib.
Baş nazir yeni taktikanın israilli girovları azad etmək üçün HƏMAS-a təzyiqi artırmaq məqsədi daşıdığını deyib.
O, əməliyyatın bütün qarşıya qoyulan məqsədlərə nail olunana qədər davam edəcəyini vurğulayıb.
Qeyd edək ki, “Moraqa dəhlizi” əslində Xan Yunislə Rəfahı ayıran yoldur. Ona nəzarət İsrail ordusuna Qəzzanın cənub hissəsini effektiv şəkildə bölməyə imkan verəcək.
