NATO üzvü olan ölkələrin diplomatlarından ABŞ Prezidenti Donald Tramp və digər Amerika rəsmilərinin Rusiyaya münasibətinin dəyişməsindən sonra müdafiə xərclərini artırmağa ehtiyac olub-olmadığı soruşulub.

TNS xəbər verir ki, bu barədə Associated Press (AP) məlumat yayıb.

"Trampın Putinlə ünsiyyətdə açıq olması və bəzi ABŞ rəsmilərinin son müsbət bəyanatları Vaşinqtonun NATO müttəfiqləri arasında şübhələr yaradıb. Sual odur ki, Rusiya təhlükə yaratmasa, nə üçün biz ÜDM-nin 5 faizini müdafiə büdcələrinə xərcləməliyik", - agentlik diplomatlardan sitat gətirib.

Məqalə müəllifləri qeyd ediblər ki, həm Avropa ölkələri, həm də Kanada öz müdafiələrinə daha çox pul xərcləmək, eyni zamanda Ukraynaya yardımı davam etdirmək niyyətindədirlər. NATO-nun iyunun 24-ü və 25-də baş tutacaq sammitində alyans hərbi büdcəni ölkələrin ÜDM-nin hazırkı 2 faizindən “3 faizdən çoxuna” artıracaq.

Qeyd edək ki, Donald Tramp dəfələrlə NATO müttəfiqlərindən müdafiə xərclərini artırmağı tələb etmək planlarını açıqlayıb. 2025-ci ilin yanvarında Ağ Evə qayıtdıqdan dərhal sonra isə ABŞ prezidenti alyansdan hərbi xərclərin ÜDM-in beş faizinə qədər artırılmasını tələb edəcəyini vurğulayıb.