ABŞ Prezidenti Donald Trampın administrasiyası qeyri-rəsmi kanallar vasitəsilə Şərqi Avropa ölkələrinə, o cümlədən Moldova və tanınmamış Kosovoya ABŞ-dən deportasiya edilən qeyri-qanuni miqrantları qəbul etməyi təklif edib.

TNS xəbər verir ki, bu barədə Wall Street Journal (WSJ) mənbələrə istinadən məlumat yayıb.

Nəşrin mənbələrinə görə, Vaşinqton həmçinin dörd Afrika ölkəsi - Benin, Ruanda, Liviya və Esvatini, eləcə də Monqolustanla qeyri-qanuni mühacirlərin ölkədən çıxarılması ilə bağlı danışıqlar aparır.

Ağ Ev iki Latın Amerikası ölkəsi - Honduras və Kosta-Rika ilə uzunmüddətli müqavilələr bağlamaq niyyətindədir.

Amerika administrasiyası bu ölkələrə miqrasiya böhranının həllində yardım müqabilində maliyyə dəstəyi və siyasi imtiyazlar təklif edir. Söhbət ölkələri vətəndaşlarını geri qəbul etməyi gecikdirən və ya imtina edən miqrantlardan gedir.

WSJ-nin qeyd etdiyi kimi, Ağ Ev artıq Panama ilə oxşar deportasiya modelini sınaqdan keçirib. Fevral ayında bir neçə Yaxın Şərq ölkəsinin 100-dən çox vətəndaşını daşıyan təyyarə Panamaya gəlib, bundan sonra yerli hakimiyyət onları vətənlərinə qaytarmağa başlayıb.

Qeyd edək ki,Tramp dəfələrlə ABŞ-ın immiqrasiya siyasətinin sərtləşdirilməsinin tərəfdarı olduğunu bildirib. Milli Təhlükəsizlik Departamentindəki New York Post mənbəsinin verdiyi məlumata görə, Trampın andiçmə mərasimindən sonra 100 mindən çox insan ölkədən qovulub.