Tramp prezident seçkilərində səs verib
ABŞ-də Respublikaçılar Partiyasından prezidentliyə namizəd Donald Tramp prezident seçkilərində səs verib.
TNS xəbər verir ki, CNN-in yaydığı məlumata görə Tramp Florida ştatının Palm-Biç şəhərindəki seçki məntəqəsində şəxsən səs verib.
Qeyd edək ki, bu gün ABŞ-də növbəti seçkilər keçirilir. Seçkilərdə prezident, vitse-prezident, Senatın üçdə biri və Konqresin Nümayəndələr Palatasının bütün üzvləri, həmçinin 11 ştatın və 2 ərazinin qubernatorları seçiləcək.
Respublikaçı namizəd Donald Tramp və ABŞ-nin hazırkı hakim Demokrat Partiyasını təmsil edən Kamala Harris dövlət başçısı postuna iddialıdırlar.
Tramp Amerikanın 45-ci prezidenti olub və 2017-2021-ci illərdə ölkəyə rəhbərlik edib. O, 2020-ci il prezident seçkilərində demokrat Co Baydenə məğlub olub.
Harris isə 2021-ci ilin yanvarından ABŞ-nin vitse-prezidentidir.