Kliniki Tibbi Mərkəz ilə bağlı redaksiyamıza şikayət daxil olub.

TNS xəbər verir ki, Oxu.Az-a danışan Aysel Həsənova qeyd edib ki, valideyninin əməliyyatı günlərdir, icra olunmur.

O, şikayətini belə izah edib:

"Anam 2024-cü il 9 oktyabr tarixində Kliniki Tibbi Mərkəzdə əməliyyat keçirib. 4 aprel 2025-ci il tarixində yenidən əməliyyat üçün xəstəxanaya müraciət etsək də, adıçəkilən xəstəxananın sterilizasiya aparatlarının 4 gündür işləmədiyi üçün əməliyyatı icra etməyəcəklərini qeyd etdilər. Aparatların hansı səbəbdən işləmədiyi barədə bizə məlumat verməyiblər.

Bülleten tarixinə əsasən, anam 8 aprel tarixində əməliyyat olunmalıdır. Müraciət etdikdə isə bizə qeyd olunan tarixə kimi aparatların bərpa olunub-olunmamasının məlum olmadığını dedilər. Hazırda Kliniki Tibbi Mərkəz yalnız təcili yardım üçün gələn xəstələri qəbul edir. Anam günlərdir, dözülməz ağrılardan əziyyət çəkir.

Necə olur ki, xəstəxanada əməliyyat olunası adamı gözlədirlər? 8 aprel tarixinə kimi aparatları işə düşəcəkmi? Belə bir problem varsa, 4 gündür, niyə həll edilmir?"

Məsələyə aydınlıq gətirmək üçün Kliniki Tibbi Mərkəzə üz tutduq.

Qurumun Mətbuat Xidmətindən qeyd edilib ki, avtoklav sterilizasiya aparatında yaranmış texniki nasazlığa görə bir sıra travmatoloji əməliyyatların icrasında müvəqqəti fasilə yaranıb:

"Sözügedən avtoklav aparatının təmiri prosesinə artıq başlanılıb, növbəti həftədən etibarən tam funksional vəziyyətə gətiriləcək və əməliyyatların icrasına başlanılacaq".