Milli Məclisin üzvü, ilahiyyatçı alim Ceyhun Məmmədov sosial şəbəkə hesabında gənclərə ünvanladığı maraqlı tövsiyələrini bölüşüb.

TNS həmin fikirləri təqdim edir:

"Hər zaman sizə verdiyi nemətlərə görə Uca Yaradana şükür edin, nankor olmayın.
Heç zaman Uca yaradanı unutmayın. Bilin ki, müsibət və faciələr insan Allahı unutduğu zaman baş verir.
Heç zaman vicdanınıza xəyanət etməyin. Bilin ki, vicdan yaralandısa, onu sağaltmaq çətin olacaq.
Hər gün özünüzü hesaba çəkin. Yaxşı və pis əməllərinizi saf-çürük edin. Çalışın o dünyada hesabınız və yükünüz ağır olmasın.
Hər zaman sözün doğrusuna qulaq asın. Heç zaman nəfsinizə uymayın, doğruları və həqiqətləri görməməzlikdən gəlməyin. Bu sizə yalnız zərər gətirəcək.
İnsanları pula, mala, vəzifəyə görə deyil, yaradana və xeyirxah əməllərinə görə sevin, dəyər verin.
İnsanların haqqına girməyin, bunun hesabının o dünyada çox ağır olacağını unutmayın.
Heç zaman əmanətə xəyanət etməyin. Bilin ki, o dünyada xəyanətin hesabı çox ağır olacaq.
Beyninizi, ürəyinizi kin-küdurət və düşmənçiliklə deyil, sevgi və məhəbbətlə bəsləyin.
Təkəbbürdən, ədəbzalıqdan və özündən razılıqdan uzaq olun. Bu sizə yalnız zərər və ziyan gətirəcək".