14-17 yaşda olan uşaqlar tərəfindən və ya onların iştirakı ilə törədilən qəsdən adam öldürmə və adam öldürməyə cəhdlə bağlı cinayətlərin sayında yenidən artım müşahidə olunur.

TNS Dövlət Statistika Komitəsinə istinadla xəbər verir ki, 2023-cü ildə bu cür cinayətlərin sayı 8 olub.

2022-ci ildə 4, 2021-ci ildə 7, 2018-ci ildə 3 olub.

Qeyd edək ki, bu rəqəmlər 2000-ci illərdə xeyli yüksək olub. 1999-cu ildə bu cür cinayətlərin sayı 18, 2000-ci ildə 12, sonrakı illərdə 15, 14, 10 kimi rəqəmlər arasında dəyişib.

Uşaqlar tərəfindən törədilən cinayətlər arasında oğurluq cinayətləri üstünlük təşkil edib. Amma bu cinayətlərin də sayında azalma müşahidə olunur. 2023-cü ildə oğurluqla bağlı cinayətlərin sayı 164 olub. 1993-cü ildə uşaqlar tərəfindən törədilən oğurluq cinayətlərinin sayı 569 olub. 2000-ci ildə bu say 327-yə düşüb.

Uşaqların törətdiyi cinayətlər arasında soyğunçuluq, quldurluq, xuliqanlıq, narkotik vasitələrin və psixotrop maddələrin qanunsuz dövriyyəsi ilə bağlı cinayətlər də üstünlük təşkil edir.