Müəllimlərin dərs yükünün 12 saata salınması mümkündür - AÇIQLAMA
“Müəllimlərin dərs yükünün 12 saata düşürülməsi o zaman mümkün olar ki, vahid əməkhaqqı sistemi tətbiq olunsun”.
Bunu TNS-ə açıqlamasında təhsil məsələləri üzrə mütəxəssis Elçin Əfəndi deyib.
O bildirib ki, müəllimlərin bir stavka dərs yükünün 18 saatdan 12 saata salınması ilə paralel olaraq əməkhaqqı da azalrsa, o zaman tədrisin keyfiyyətindən danışmaq doğru olmaz: “Bilirsiniz ki, hazırda müəllimlərin dərs yükü tam ştat 18 saatdır. Bəzi hallarda müəllimlər heç dərs saatları arasında tənəffüs də etmirlər. Elə müəllim var ki, indiki dövrdə ən çoxu 6-8 və ya 10 saatla kifayətlənir. Qalan vaxtlarını repetitorluğa sərf edirlər. Amma bəzi müəllimlər təkcə təhsil müəssisəsində çalışırlar. 18 yox, həftəlik hətta 32-34 saata qədər dərs tədrisi ilə məşğul olurlar. Hər bir müəllim üçün 12 saat təyin olunarsa, əməkhaqqı məsələsinə mütləq baxılmalıdır. Vahid əməkhaqqı təyin olunarsa, deyək ki, 12 saata görə hər bir müəllimə 800-1000 manat verilərsə, bu, müəllimlər üçün əlverişli imkan yarada bilər. Onlar tədrisin keyfiyyəti baxımından özlərini prosesin içərsində daha çox hiss etməyə çalışarlar ki, təhsilalanlara daha çox bilik və bacarıq ötürə bilsinlər. Məlumdur ki, repetitorluq edən müəllimlər daha az dərs saatı götürür, qalan müddəti evdə dərs verirlər. Mənə görə, bu, doğru yanaşma deyil. Amma əməkhaqları tənzmilənərsə, ümumi tədrisin keyfiyyətini yüksəltmək üçün daha çox bilik və bacarıqları yüksək olan müəllimlərin sayını artırmalıyıq. Eyni zamanda, sinif otağında şagirdlərin sayını azaltmalıyıq. Sinifdə ən çoxu 20-25 nəfər şagird olarsa, bu zaman effekttiv nəticə əldə etmək olar”.
Mütəxəssis bildirib ki, şagird sayı 35-40, hətta 45-ə qədər qalxarsa, təhsilin keyfiyyətindən danışmaq o qədər doğru deyil: “Bir dərs saatı müddəti o qədər şagirdin bilki və bacarıqlarının yoxlanmasına, mövzunu tədris etməyə kifayət etmir. Çünki müəllimlərin üzərində əlavə yüklər-elektron jurnal yazmaq, summativ qiymətləndirmə, kağız jurnalda qeyd etmək və s. kimi işlər də var. Ona görə şagird sayı azalmalıdır. Bunun üçün də yeni tədris müəssisələri tikilməlidir”.
Aygün
