Ötən il bu qədər şəxsə 25 il iş stajı hədiyyə olunub
Məlumdur ki, “Əmək pensiyaları haqqında” Qanunda 2019-cu ilin əvvəlindən tətbiq olunan dəyişikliyə əsasən, fərdi hesabında 01.01.2006-cı ildən 01.07.2018-ci ilədək dövr üzrə hər hansı məbləğdə pensiya kapitalı olan pensiya yaşına çatan şəxsə avtomatik 25 il sosial sığorta stajı (pensiya hüququ qazanmaq üçün də minimum staj tələbi 25 ildir) hədiyyə edilir. Nəticədə o, hətta heç bir stajı olmadıqda belə, pensiya hüququ qazanır.
Bəs, ötən il ərzində nə qədər insana 25 il staj hədiyyə edilməsi yolu ilə pensiya təminatı reallaşıb?
TNS-in mövzu ilə bağlı sorğusu Əmək və Əhalinin Sosial Müdafiəsi Nazirliyi tərəfindən cavablandırılıb.
Bildirilib ki, pensiya yaşına çatan və 01.01.2006-01.07.2018-ci illər ərzində fərdi şəxsi hesabının sığorta hissəsində məbləğindən asılı olmayaraq pensiya kapitalı qeydə alınan şəxslərə 25 il iş stajı güzəşti tətbiq edilməklə yaşa görə pensiya təyin edilir: “Pensiya təminatına əlçatanlığın artırılmasına xidmət edən bu humanist tədbir 2024-cü ildə də davam edib. Ötən il qeyd edilən kateqoriyaya aid olan, yəni, pensiya yaşına çatan və 01.01.2006-01.07.2018-ci illər ərzində fərdi şəxsi hesabının sığorta hissəsində məbləğindən asılı olmayaraq pensiya kapitalı qeydə alınan 31,4 min şəxsə 25 il staj hədiyyə edilərək, e-sistem üzərindən proaktiv (elektron) qaydada yaşa görə pensiya təyin olunub”.
Xatırladaq ki, hədiyyə edilən həmin 25 il sığorta stajının 2023-cü ilin əvvəlindən artıq hər il üçün 1 il azaldılması nəzərdə tutulurdu.
Məsələn, fərdi hesabında 01.01.2006-cı ildən 01.07.2018-ci ilədək dövr üzrə hər hansı məbləğdə pensiya kapitalı olan şəxsə 2023-cü ildə artıq 25 il yox, 24 il, 2024-cü ildə 23 il, 2025-ci ildə 22 il və s. staj hesablanacaqdı və lazım olan minimum 25 illik stajın qalan hissəsi isə pensiya yaşına çatmış şəxsdən tələb olunacaqdı.
2022-ci ilin sonunda Prezident İlham Əliyev tərəfindən təsdiqlənən qanunla 25 il sığorta stajının hədiyyə edilməsi müddəti 3 il uzadılıb. Yəni, qeyd edilən 25 il sığorta stajının hər il üçün 1 il azaldılması artıq 2023-cü ildən deyil, 2026-cı ildən tətbiq ediləcək.
Aygün
