Azərbaycan Texniki Universitetinin (AzTU) tələbələri arasında tədris ili başlayandan inidiyədək təqaüdlərini ala bilməyənlər var.

Bu barədə tələbələr sosial şəbəkələrdə yazıb.

TNS onların hansı səbəbdən təqaüd ala bilməməsi ilə bağlı AzTU-ya sorğu ünvanlayıb.

Ali təhsil ocağının mətbuat xidmətinin rəhbəri Sevinc İsgəndərova saytımıza bildirib ki, təqaüdlərin yubanması təqaüd kartlarının hazırlanması ilə əlaqəlidir: “Yuxarı kurs tələbələrinin təqaüdü hər ay vaxtında köçürülür. 1-ci kurs tələbələrinin isə təqaüd kartı hazırlanırdı. Ona görə onlar təqaüd ala bilmirdilər. Artıq kartlar hazırdır. Sadəcə, hazırda ölkədə keçirilən COP29-a tədbirlərinə görə distant təhsilə keçidldiyi üçün kartların paylanılması yubandı. Ənənəvi tədris bərpa olunan kimi kartlar təqdim olunacaq və təqaüd yüklənəcək. Tələbələr sentyabr və oktyabr aylarının təqaüdünü birlikdə, noyabrı isə ayın sonuncu günü ala biləcəklər”.

S. İsgəndərova onu da əlavə edib ki, hər il bütün universitetlərdə 1-ci kursların kartları təxminən indiki tarixlərdə hazır olur. Belə ki, kartlar bankda hazırlandığı üçün tədris ilinin ilk aylarında proses kütləvi xarakter aldığından yubanmalar ola bilir. 

Aygün