ARB telekanalına və həmin kanalda Xoşqədəm Hidayətqızının aparıcılığı ilə yayımlanan “Səni axtarıram” verilişinə İmişlidə itkin düşmüş 11 yaşlı Rasim Xankişiyevlə bağlı müzakirə aparılmasına qadağa qoyulub.

TNS Teleqraf.com-a istinadən xəbər verir ki, Yasamal Rayon Məhkəməsi Rasimin atasının müraciəti əsasında belə qərar qəbul edib.

Ailənin nümayəndəsi kimi çıxış edən Samir Zeynalovun sözlərinə görə, ailə hesab edib ki, Xoşqədəm Hidayətqızı Rasimin axtarışını şou predimetinə çevirməklə izləyici reytinqi xatirinə hər gün ekran üzərindən minlərlə insanı aldadıb. Ən əsası verilişdə gedən müzakirələr Rasimin yerinin bu günə kimi müəyyən edilməməsinə təsir edib.

Ərizədə o da qeyd olunub ki, Xoşqədəm Hidayətqızı əvvəl Rasimi tapacağı haqda ailəyə vəd verib. Vədini yerinə yetirə bilməyəcəyini görəndə yeniyetmənin ailə üzvlərinin düşdüyü acınacaqlı vəziyyəti nəzərə almadan, Rasimin axtarışı ətrafında saxta ssenari hazırlayıb.

Yasamal Rayon Məhkəməsinin hakimi Ülkər Xəlil ailənin müraciətini əsaslı hesab edib.

Hakim belə qənaətə gəlib ki, məsələdə müvəqqəti təminat tədbirinin görülməsi qaçılmazdır.

Qərara əsasən ARB telekanalında, xüsusilə “Səni axtarıram” verilişində Rasimin axtarışı ilə bağlı müzakirə aparmaq, həmçinin fotolarını yayımlamaq qadağan edilib.