31 Dekabr – Dünya Azərbaycanlılarının Həmrəyliyi Günü və Yeni il əlaqədar Bakı şəhər və paytaxtın rayon icra hakimiyyətləri tərəfindən müvafiq hazırlıq tədbirləri həyata keçirilir.

Bakı Şəhər İcra Hakimiyyətinin Mətbuat xidmətindən TNS-ə verilən məlumata görə, artıq şəhərin parklarının, meydan və küçələrinin bəzədilməsi, burada Yeni il atributlarının, işıqlı çilçıraqlar və digər bəzəklərin quraşdırılması işləri yekunlaşıb.

Bildirilib ki, ənənəvi olaraq, bayram tərtibatı işləri görülən Neftçilər prospekti, Yusif Səfərov, Niyazi, İstiqlaliyyət küçələri və Azərbaycan prospekti də bayramla bağlı bəzədilir.

“Azneft” dairəsində isə yeni il şam ağacı kompleksi yaradılıb. Bu, şəhərin simvolik məkanlarından biri olan “Azneft” dairəsində bayramın qeyd edilməsi ənənəsini yaşadır və vətəndaşları, turistləri möhtəşəm bir bayram görüntüsü ilə qarşılayır.

Həmçinin rayon icra hakimiyyətlərinə tövsiyə edilib ki, bayramla bağlı ərazilərində nümunəvi küçələr hazırlansın.

Aygün