Türkiyənin Antalyanın Demre rayonundakı Müqəddəs Nikolay kilsəsində sarkofaq aşkarlanıb.

TNS xəbər verir ki, bu barədə Hatay Mustafa Kamal Universitetinin müəllimi, qazıntı aparan heyətin rəhbəri, dosent Ebru Fatma Fındık bildirib.

Onun sözlərinə görə, bina daxilində qazma işləri apararkən gözlənilmədən bir sarkofaqla qarşılaşıblar: “Bu, bəzəksiz sarkofaqlar qrupuna aid olan yerli daşdan hazırlanmış və bir qədər hündür tağlı damı olan nümunədir. Qapağın üst tərəfində yarım dairəvi bir çıxıntı və tutacaq mövcuddur. Təxminən 2 metr uzunluğunda olan sarkofaqın yeraltı hissəsinin 1,5-2 metr hündürlüyündə olduğu təxmin edilir. İlkin araşdırmalara əsasən, bu sarkofaq bölgədə tapılan digər sarkofaqlarla oxşar xüsusiyyətlərə malikdir”.

Alim bildirib ki, ilk dəfə olaraq, bir sarkofaq öz yerində aşkarlanıb: “Müqəddəs Nikolayın məzarının yerləşdiyi ehtimal edilən kilsənin bu qədər yaxınlığında bir sarkofaqın üzə çıxarılması bizi həyəcanlandırdı. Layihə çərçivəsində sarkofaqın yerləşdiyi ərazinin qazıntı və bərpa işlərini tamamlayaraq, ölkəmizin turizminə töhfə verməkdən qürur duyacağıq”.