Türkiyənin iki qitəni birləşdirən möhtəşəm şəhəri İstanbul Yeni ili romantik və unudulmaz etmək istəyən cütlüklər üçün ideal məkandır. Bosforun sehrli sularında gəmi turu, Şahzadə Adalarının sakitliyində istirahət, tarixi qüllələrin zirvəsində xatirələrə yazılacaq anlar, Michelin ulduzlu restoranlarda romantik bir şam yeməyi Yeni ilinizi unudulmaz edəcək.

Sadaladıqlarımız İstanbulun füsunkar gözəlliyini hiss etmək üçün mükəmməl seçimlərdir.

Yeni il səfərinizə başlamazdan əvvəl bol çeşidli, həm şirin, həm də duzlu təamlardan ibarət zəngin bir türk səhər yeməyi və yaxşı dəmlənmiş çayla günə enerji qatın. Kəşf etdikcə heyran qalacağınız İstanbul aşiq cütlüklər üçün bənzərsiz bir şəhərdir. Memarlıq möcüzələri, rəngarəng küçələri və sənət incisi olan muzeyləri ilə bu şəhər əl-ələ dolaşaraq, kəşf edilir.

Şəhərin ən romantik simvollarından olan Qalata və Qız qüllələri yolunuzu gözləyir. Qalata qülləsinə birlikdə ilk dəfə qalxanların bir gün evlənəcəyinə dair məşhur bir rəvayət var. Bosforun ortasında zərif bir qız kimi dayanan Qız qülləsi isə bu gözəl şəhərin bütün cazibəsini özündə əks etdirir və muzey kimi yenidən ziyarətçilərini qəbul edir.

Günün sonunda 2025-ci ili İstanbulun məşhur meyxanalarında rakı ilə qarşılaya bilərsiniz. Yerli meyxanalarda İstanbulun ən ləziz balığı, müxtəlif məzələr və canlı musiqi ilə unudulmaz bir gecə sizi gözləyir. Bunlar yalnız İstanbula məxsus yerlərdir!

Yeni ili fərqli və yaddaqalan şəkildə qarşılamaq istəyirsinizsə, səfərinizi Bosfor boğazında unudulmaz bir dəniz macərasına çevirə bilərsiniz. Anadolu ilə Avropanı birləşdirən bu möhtəşəm boğazda üzmək İstanbula gələn hər turistin  xəyalıdır. Şəhərin füsunkar mənzərələrini seyr etmək üçün Bosforun sularında gəzinti turlarına qatılmaq və ya yerlilərlə birlikdə bir bərə səyahətinə çıxmaq ən gözəl seçimlərdən biridir. Gəmi səyahətiniz boyunca bir "simit" götürüb qağayıları bəsləmək isə sizin səfərinizə nostaljik bir rəng qatacaq.

Bu macəranı daha da maraqlı etmək üçün cütlük olaraq qayıqla avar çəkmək, kano sürmək və ya su velosipedi ilə Bosforun büllur sularında əsl sərgüzəşt yaşaya bilərsiniz. Təcrübəli təlimçilərin rəhbərliyi altında bu gəzinti zamanı əsrarəngiz köşklərin önündən keçəcək, İstanbulun tarix dolu abidələrinə heyranlıqla tamaşa edəcəksiniz.

Axşam isə ulduzların işığında Bosforun sakit sularında yaxtaya minərək Yeni ili qarşılamaq üçün yola çıxın. Özəl bir masada romantik bir şam yeməyi ilə başlayan bu axşam canlı musiqi və şənliklərlə Yeni il ruhuna bürünəcək.

Yeni ildən əvvəl bir az tək qalmaq, şəhərin səs-küyündən uzaqlaşmaq istəyirsinizsə, İstanbulun yaxınlığında yerləşən Şahzadə Adaları mükəmməl bir seçimdir. Bu adalar romantizmi və sakitliyi bir arada təqdim edir. Burada adanın möhtəşəm mənzərələrinə heyran qalacağınız butik otellərdən birində gecələyə bilərsiniz.

Adanın sükunətində əl-ələ gəzərkən, tarixi malikanələrin arasından keçib, heyrətamiz mənzərələri izləyə bilərsiniz. İstəsəniz, velosipedlə adaları kəşf etmək də başqa bir əyləncəli alternativdir. Görməli yerləri ziyarət etdikdən sonra, sahil boyunca bir balıq restoranında Yeni ili qarşılamaq isə bu romantik tətilin zirvəsi olacaq. Mövsümi təzə balıqlar, zəngin türk məzələri, salatlar və rakı ilə bəzənmiş bir axşam şənliyi bu gecəni unudulmaz edəcək.

İstanbulda Yeni ili daha fərqli və unikal şəkildə keçirmək istəyirsinizsə, şəhərin məşhur hamamlarında rahatlamaq gözəl bir seçim ola bilər. Bu, cütlüklər üçün mükəmməl bir təcrübədir – birgə rahatlamaq və dincəlmək istəyənlər üçün əla bir fürsətdir. Masajçılar tərəfindən edilən bədəninizi təmizləyən və rahatladan masajla özünüzü həm fiziki, həm də mənəvi cəhətdən yenilənmiş hiss edəcəksiniz.

Türk hamamının verdiyi təcrübəni yaşadıqdan sonra yerli mətbəxlə tanış olmaq mütləqdir. Küçə yeməkləri ilə mədəninizi şənləndirə bilər və günün sonunda sahil boyu restoranlarda şam edə bilərsiniz. İstanbulun Michelin ulduzlu restoranları Yeni ili şirin bir başlanğıc ilə qarşılamağı vəd edir.

İstanbul bayram mövsümündə öz sehrini daha da artırır. İstiklal prospekti, Nişantaşı və Kadıköy kimi məşhur məkanlar bayram işıqları ilə bəzədilərək, şəhərin enerjisini başqa bir səviyyəyə qaldırır. İstiklalda hər tərəf bayram əhval-ruhiyyəsində olur. St. Antuan Kilsəsi, böyük Yeni il ağacı, güllər və şamlarla ziyarətçiləri qarşılayır, Nişantaşında isə ən trend Yeni il ağacı göz oxşayır. Kadıköy Yeni il temalı şirniyyat dükanları ilə diqqət çəkir.

Yeni ili izdihamla qarşılaya və ya zərif barlarda və dam terraslarında unudulmaz şənliklərdə iştirak edə bilərsiniz.